މަޖިލީހުގެ ރައީސް މުހައްމަދު ނަޝީދުއަށް މިއަދު ފޮނުވި ސިޓީގައި ބުނެފައިވަނީ މި މަހުގެ 14 ވަނަ ދުވަހު އއ. ތޮއްޑޫގައި މާބަނޑު އަންހެނަކު އެ އަތޮޅު ރަސްދޫ ހޮސްޕިޓަލަށް ގެންދިއުމުގައި ލަސްވުމުގެ ސަބަބުން އަންހެން މީހާގެ ބަނޑަށް ދަރިފުޅު މަރުވެފައިވާ ކަމަށެވެ.
އަދި މި މަހުގެ 25 ވަނަ ދުވަހު ށ. ނަރުދޫގައި މާބަނޑު އަންހެނަކު ށ. އަތޮޅު ހޮސްޕިޓަލަށް ވިހެއުމަށް ގެންދިމުގެ ހުއްދަ ލިބިފައިނުވާ ކަމަށާއި އެގޮތުން ށ. މިލަންދޫ އިން ހދ. ކުޅުދުއްފުށީ ރީޖަނަލް ހޮސްޕިޓަލަށް ގެންދެނުއިރު އަންހެނާގެ ބަނޑަށް ދަރި މަރުވެފައިވާކަމަށް އެ ސިޓީގައި ބުނެ އެވެ.
އޭގެ އިތުރުން މި މަހުގެ 22 ވަނަ ދުވަހު އޭޑީކޭ ހޮސްޕިޓަލަށް ބަލިވެގެން ގެންދެވުނު ހަތަރު މަހުގެ ތުއްތު ކުއްޖާ މަރުވެފައި ވަނީ ފަރުވާ ދިނުމުގައި އިހުމާލުވެފައިވާތީ ކަމަށް ތުއްތު ކުއްޖާގެ އަާއިލާއިން ތުހުމަތު ކުރާކަމަށް ސިޓީގައިވެ އެވެ.
އަދި ކުއްޖާއަށް ދިމާވި ހާލަތަކީ ވަގުތުން ސާޖަރީ ކުރަންޖެހޭ ހާލަތެއްކަމަށް މައުލޫމާތު ލިބިފައިވަނީ ކުއްޖާ މަރުވި ފަހުންކަމަށާއި އެކުއްޖާއަށް ފަރުވާ ނުދެވި ލަސްވެފައިވާކަމަށް އާއިލާއިން ބުނެފައިވާކަމަށްވެސް ސިޓީގައި ވެއެވެ.
އެހެންކަމުން އެ ތިން މައްސަލަ ތަހުގީގުކޮށްދިނުމަށް މަޖިލީހުގެ ރައީސްގެ އަރިހުން އެދޭކަމަށް ޝީޔާމް ފޮނުވި ސިޓީގައިވެ އެވެ.
