މޯލްޑިވްސް ޕޯޓްސް ލިމިޓެޑް އިން ނެރިފައިވާ ބަޔާނެއްގައި ބުނީ، ކޮވިޑް-19 ރާއްޖެއަށް ފެތުރެމުންދާ މި ހާލަތުގައި، މުދާ ގެންނަ ފަރާތްތަކަށް ލުއި ދިނުމުގެ ގޮތުން، ކުޅުދުއްފުށި ޕޯޓް ޕްރައިވެޓް ލިމިޓެޑާއި، ހިތަދޫ ޕްރައިވެޓް ޕޯޓް ލިމިޓަޑުން ލުއި ތަކެއް ދިނުމަށް އެ ދެ ކުންފުނީގެ ބޯޑުން ނިންމާފައިވާ ކަމަށެވެ.
އެގޮތުން، މުދާ ގެންނަ ފަރާތްތަކުގެ ބައެއް ފީތައް ވަކި މުއްދަތަކަށް ނުނެގުމަށް އެ ދެ ކުންފުނިން ވެސް ވަނީ ނިންމާފަ އެވެ.
މޯލްޑިވްސް ޕޯޓްސް ލިމިޓެޑް އިން ބުނީ، އޭޕްރީލް މަހުގެ ފަސް ވަނަ ދުވަހުން ފެށިގެން އަންނަ މަހުގެ ފަސް ވަނަ ދުވަހުގެ ނިޔަލަށް، ކުޅުދުއްފުށީ ޕޯޓާއި ހިތަދޫ ޕޯޓަށް ބާލާފައިވާ ހުރިހާ ބާވަތެއްގެ މުދަލުގެ ސްޓޯރޭޖް ނުވަތަ ޑެމަރެޖް ފީ އަދި އެމްޓީ ކޮންޓެއިނަރު ސްޓޯރޭޖް ފީ ނުނަގާ ގޮތަށް ނިންމާފައިވާ ކަމަށެވެ.
އަދި އެ މުއްދަތުގެ ކުރިން އެ ދެ ބަނދަރަށް ބާލާފައިވާ މުދަލުގެ ތެރެއިން އޭޕްރީލް މަހުގެ 15 ވަނަ ދުވަހާ ހަމައަށް ފްރީ ސްޓޯރޭޖް މުއްދަތު ހަމަވެފައިނުވާ މުދަލުގެ ސްޓޯރޭޖް ނުވަތަ ޑެމަރެޖް ފީ އަދި އެމްޓީ ކޮންޓެއިނަރު ސްޓޯރޭޖް ފީ އޭޕްރީލް މަހުގެ 15 ވަނަ ދުވަހުން ފެށިގެން އަންނަ މަހުގެ ފަސް ވަނަ ދުވަހާ ހަމައަށް ނުނަގާ ގޮތަށް މިހާރު ވަނީ ހަމަޖައްސާފައި ކަމަށް ވެސް ވަނީ ބުނެފަ އެވެ.
އޭގެ އިތުރުން، ޖުލައި މަހުގެ ފަސް ވަނަ ދުވަހުގެ ކުރިން ކްލިއަ ކުރާ މުދަލަށް އެ އުސޫލުގެ ދަށުން އަމަލުކުރުމަށް ވެސް ނިންމާފައިވާ ކަމަށް މޯލްޑިވްސް ޕޯޓްސް ލިމިޓެޑުން ވަނީ ބުނެފަ އެވެ.
