ޗެނަލް13 ގެ ޕްރޮގްރާމެއްގައި ރައީސް ޔާމީނުގެ ވެރިކަމުގައި އިކޮނޮމިކް މިނިސްޓަރުކަން ކުރެއްވި ސައީދު ވިދާޅުވީ މި ސަރުކާރަށް ދެ އަހަރުވެގެންދާއިރު ސަރުކާރުން ރައްޔިތުންނަށް އެކަށީގެންވާ ގޮތެއްގައި ހިދުމަތް ނުދެވޭ ކަމަށެވެ.
އެގޮތުން މިހާރު ވެސް ފެނިގެންދަނީ އެމްޑީޕީގެ ސަރުކާރުގެ ތެރޭގައި ދެ ސަރުކާރެއް ހަދައި ތަޅާފޮޅާ މަންޒަރު ކަމަށާއި އަދި ހުރިހާ ބާރު ލިބުމުން ވެސް ރައްޔިތުންނަށްވީ ވައުދު ނުފުއްދެވެންވީ ސަބަބު ނޭނގޭ ކަމަށް ސައީދު ވިދާޅުވި އެވެ.
ސައީދު އިތުރަށް ވިދާޅުވީ އިގްތިސޯދީ ގޮތުން ވެއްޓިފައިވާ އަނދަވަޅުން ސަލާމްކުރުމަށް ރައީސް ޔާމިންގެ ހިދުމަތް މުހިންމުކަމަށާއި އެކަމަށް ގިނަ ރައްޔިތުން އިންތިޒާރުކުރުންކަމުން އަންނަ ކަމަށެވެ. އަދި ރާއްޖޭގެ ތަރައްގީއަށް ރައީސް ޔާމިން ފަދަ ވެރިއެއްގެ ހިދުމަތް މުހިންމުވެފައިވާކަމަށް ވެސް ސައީދު ފާހަގަކުރެއްވި އެވެ.
ސައީދު ވިދާޅުވީ މި ސަރުކާރަކީ ހުޅަނގުގެ ގައުމުތަކާ ގާތް ގުޅުމެއް އޮންނަކަމަށް ބުނެ މަސައްކަތް ކުރަމުން އަންނަ ސަރުކާރެއް ކަމަށެވެ. އެހެންކަމުން އެމްއެމްޕީއާރުސީ ފަދަ ބޮޑު މައްސަލަތައް ބެލުމަށް އެފްބީއައި ފަދަ ބައެއްގެ އެހީތެރިކަން ނުހޯދިގެން އުޅެނީ ކީއްވެތޯ ސައިދު ވަނީ ސުވާލު އުފައްދަވާފަ އެވެ.
އޭނާ ވިދާޅުވީ އެމްއެމްޕީއަރުސީ މައްސަލައަކީ ރައީސް ޔާމިނުގެ ވެރިކަމުގައި އެމަނިކުފާނު އިސްނަގަވައިގެން ކުރިއަށް ގެންދަވަން ފެށި މައްސަލައަކަށްވާއިރު މިއަދު ފެނިގެން މިދަނީ ބޭއިންސާފުން އެމަނިކުފާނު ޖަލަށްލައި އަނިޔާވެރިވަމުން އަންނަ ތަން ކަމަށާއި އެ ވާހަކަ އެންމެ ވެސް ދައްކަމުން އަންނަ ކަމަށެވެ.
އޭގެ އިތުރުން ސައީދު ވިދާޅުވީ ރައީސް ޔާމިން ފަލީހަތް ކުރުމަށް ޝަރީއަތް ލައިވްކޮށްގެން ކުރިއަށް ގެންދިޔަ ނަމަވެސް އެކަމުގައި އެމަނިކުފާނު ހުންނެވީ ސާބިތުކަމާއެކު ކަމަށެވެ. އެގޮތުން ރައްޔިތުން، އެމަނިކުފާނަކީ ކުށެއް ނެތް ބޭފުޅެއްކަން ގަބޫލު ކުރައްވާ ކަމަށް ވެސް ސައީދު ވިދާޅުވެ އެވެ.
