މިދިޔަ ބުރާސްފަތި ދުވަހު ޒައިރާ ވަނީ ގުރުއާނުގެ އާޔަތެއްގެ މާނަ ހިއްސާކޮށް ޓްވީޓެއްކޮށްފަ އެވެ. އެގޮތުން އަލް އައުރާފު ސޫރަތުގެ 133 ވަނަ އާޔަތުގެ މާނަ އޭނާ ހިއްސާކުރުމާއެކު ގިނަ ބައެއްގެ ފާޑުކިޔުންތައް އޭނާއަށް އަމާޒުވި އެވެ.
"ދެން ކަނޑައެޅި، ބަޔާންވެގެންހުރި އާޔަތްތަކެއް ތަކެއް ކަމުގައި (ފެންބޮޑުވުމުގެ) ތޫފާން އާއި، ގޮއްފުޅަނގާއި، ސުކުނާއި، ބޮކާއި، ލޭ، ތިމަންރަސްކަލާނގެ އެއުރެންގެ މައްޗަށް ފޮނުއްވީމެވެ. ދެންވެސް އެއުރެން ބޮޑާވެގަތޫއެވެ. އަދި އެއުރެން ކުށްވެރި ބަޔަކު ކަމުގައިވާއެވެ،" އައުރާފު ސޫރަތުގެ 133 ވަނަ އާޔަތުގެ މާނައިގައިވެ އެވެ.
އެއާޔަތް ހިއްސާކުރުމާއެކު ޒައިރާއަށް ފާޑުކީ މީހުން ބުނެފައި ވަނީ ޒައިރާ ވަރަށް ކަމުދާ ކަމަށާއި އެކަމަކު އެފަދަ "ދޯހަޅި" ވާހަކަ ދައްކާތީ ފޫހިވާ ކަމަށެވެ. އެގޮތުން ކޮވިޑް-19 ގެ ބަލިމަޑުކަން ބޯމަތިވުމާއި ތޫފާންތަކާއި ގޮއްފުޅަނގު ފަދަ އެއްޗެހީ ސަބަބުން އެތައް ބަޔަކު ވޭނުގައި އުޅެމުން އަންނަ ކަމަށެވެ. އެކަމަކު ޒައިރާ ބުނަނީ އެއީ އެމީހުންނަށް އޮތް އަދަބެއް ކަމަށެވެ.
އެކަމާއި ގުޅިގެން އޭނާއަށް އެންމެ ބޮޑަށް ފާޑުކީ ހިންދޫންނެވެ. އެތައް ފާޑުކިޔުމާއެކު އެމީހުންނާއި ކުރިމަތިލުވުމުގެ ބަދަލުގައި ޒައިރާ ވަނީ ފުރަތަމަ ޓްވީޓް ޑިލީޓްކޮށްފަ އެވެ. ފަހުން އޭނާ ވަނީ ސޯޝަލް މީޑިއާ އެކައުންްޓްތައް ޑިލީޓްކޮށްފަ އެވެ.
އެކަމަކު އެނބުރި އައުމުން ވެސް ފާޑުކިޔުމެއް ނުހުއްޓުނެވެ. ސޯޝަލް މީޑިއާ އެކައުންޓްތައް ޑިލީޓްކުރީ ކީއްވެތޯ މީހަކު ކުރި ސުވާލުގައި އޭނާ ވަނީ އޭނާއަކީ ވެސް އިންސާނެއް ކަމަށާއި ކެތްވާނީ ވަކިވަރަކަށް ކަމަށް ބުނެފަ އެވެ.
އެފަދަ ފާޑުކިޔުމެއް ކުރިމަތިވިޔަސް ޒައިރާގެ ދިފާއުގައި އެތައް ބަޔަކު ނިކުތެވެ. އަދި ގަބޫލުކުރިޔަސް ނުކުރިޔަސް ކޮންމެ ކަމެއް ވެސް ހިނގާނީ އެކަލާނގެ އެންގެވި ގޮތަށް ކަމަށް ބުންޏެވެ.
ބޮލީވުޑުގެ ކުޅަދާނަ ތަރި އާމިރު ހާނުގެ ފިލްމު، "ދަންގަލް" އިން ބޮލީވުޑަށް ތައާރަފުވި ޒައިރާ ފެނުނީ ތިން ފިލްމަކުންނެވެ. އެއީ ހިޓް ތިން ފިލްމެވެ. ކުޑަ ދުވަސްކޮޅެއްގެ ތެރޭގައި އޭނާ ވަނީ އެތައް ބައެއްގެ ލޯބި ހޯދާފަ އެވެ.
މިދިޔަ އަހަރު ޒައިރާ، ފިލްމީ ދާއިރާއާ ދުރަށް ޖެހިލީ އެކަމުގެ ސަބަބުން ދީނީ ކަންކަމާއި ދުރުވާ ކަމަށް ބުނެ އެވެ. އޭގެ ފަހުން އޭނާ ވަނީ އޭނާގެ އިންސްޓަގްރާމުގައި ހުރި ފިލްމީ ދާއިރާގެ ޕޯސްޓްތައް ވެސް ޑިލީޓްކޮށްލާފަ އެވެ.
