މެންޗެސްޓާ ސިޓީގެ ސަސްޕެންޝަނާއި ގުޅިގެން އެ ކްލަބުން ޔުއެފާއާ ދެކޮޅަށް ހުށަހަޅާފައިވާ މައްސަލައިގެ އަޑު އެހުންތައް މިއަދު ފެށޭއިރު، ތިން ދުވަހަކަށް ތާވަލުކޮށްފައިވާ މި މައްސަލަ ކުރިއަށް ގެންދާނީ އާއްމުކޮށް ހުޅުވާލައިގެނެއް ނޫނެވެ. ކޮވިޑާ ގުޅިގެން ދަތުރުފަތުރުގެ ހުރަސްތަކާއި ހެދި އަޑު އެހުންތައް ކުރިއަށްދާނީ ވީޑިއޯ ކޮންފަރެންސް މެދުވެރިކޮށެވެ.
ފައިނޭންޝަލް ފެއާޕްލޭ ގެ އުސޫލުތަކާ ހިލާފުވެފައި ވާތީ އާއި އަދި ކްލަބް ލައިސަންސިންގައި މަކަރު ހަދާފައި ވާތީ ދެ އަހަރު ދުވަހަށް ޔުއެފާގެ އެއްވެސް މުބާރާތެއްގައި ވާދަނުކުރެވޭ ގޮތަށް މެންޗެސްޓާ ސިޓީ ސަސްޕެންޑްކޮށްފައިވަނީ ހުސްވި ފެބްރުއަރީ މަހުގެ ތެރޭގައެވެ. ޔުއެފާގެ މިނިވަން ތަހުގީގަކަށް ފަހު، މެންޗެސްޓަރ ސިޓީ ދެ އަހަރަށް ސަސްޕެންޑްކުރުމުގެ އިތުރުން ތިރީސް މިލިއަން ޔޫރޯއިންވަނީ ޖޫރިމަނާކޮށްފައެވެ. ސަސްޕެންޝަންގެ އަދަބު ފަށާނީ އަންނަ ސީޒަނުން ފެށިގެންނެވެ.
މީޑިއާ ރިޕޯޓްތައް ބުނާ ގޮތުން، ފައިނޭންޝަލް ފެއާޕްލޭ ގެ އުސޫލުތަކާ ހިލާފުވެފައިވަނީ ސްޕޮންސަރުންގެ ފަރާތުން ލިބިފައިވާ ފައިސާތަކުގެ ބޮޑެތި އޮޅުވާލުންތަކެއް އޮޅުވާލައިގެންނެވެ. މެންޗެސްޓަރ ސިޓީއަށްވަނީ ފައިނޭންޝަލް ފެއާޕްލޭގެ އުސޫލުތަކާއި ހިލާފުވެގެން ޔުއެފާގެ އަދަބު މީގެ ކުރިންވެސް ލިބިފައެވެ.
ސްވިޓްޒަލަންޑްގެ ލޯސޯންގައި ގާއިމްކޮށްފައިވާ ކޯޓް އޮފް އާބިޓްރޭޝަން އޮފް ސްޕޯޓްސްއަކީ ކުޅިވަރުގައި ދިމާވާ މައްސަލަތައް ހުށަހަޅާ ބައިނަލްއަޤްވާމީ ކޯޓެވެ. އެ ކޯޓުން މި މައްސަލައިގާ، އަންނަ ސީޒަން ފެށުމުގެ ކުރިން ގޮތެއް ނިންމާނެ ކަމަށް ބެލެވެއެވެ.
