މިއާއެކު ދުނިޔޭގެ ސިއްހަތު ޖަމިއްޔާއިން ރާއްޖެއަށް ހަދިޔާކުރި ޓެސްޓް ކިޓްތަކުގެ އަދަދު 41000 އަށް އަރަ އެވެ.
އެކަމާއި ގުޅިގެން މިއަދު ހެލްތު މިނިސްޓަރު އަބްދުﷲ އަމީން ވަނީ ދުނިޔޭގެ ސިއްހަތު ޖަމިއްޔާއިން ރާއްޖެއަށް ކަނޑައަޅުއްވާފައި ހުންނަވާ މަންދޫބު ޑރ. އަރުވިންދު މަތޫރުއާ ބައްދަލުކުރައްވާ އެކަމަށްޓަކައި ޝުކުރު އަދާކުރައްވާފަ އެވެ.
މިނިސްޓަރު އަމީން ވިދާޅުވީ، ކޮވިޑްގެ އެންމެ އުނދަގޫކަމެއްގެ ގޮތުގައި ފާހަގަކުރެވިފައި ވަނީ ޓެސްޓްކުރުން ކަމަށާއި އެގޮތުން އެ އުދަނގޫ ވަގުތުގައި ޓެސްޓްކުރެވެނީ ދުނިޔޭގެ ސިއްހަތު ޖަމިއްޔާގެ އެހީތެރިކަމާއެކު އެވެ.
އަދި އިތުރަށް ވިދާޅުވީ އަތޮޅު ތެރޭގައި ޓެސްޓް ކުރެވޭނެ އިންތިޒާމުތައް ހަމަޖެއްސުމުގައި ވެސް އެ ޖަމިއްޔާއިން އަންނަނީ އެހީތެރިކަން ފޯރުކޮށްދެމުން ކަމަށާއި އެގޮތުން އެކަމަށް ބޭނުންވާ ވަސީލަތްތައް ރާއްޖެއަށް ހޯދައިދިނުމަށް އެ ޖަމިއްޔާއިން މަސައްކަތް ކުރަމުން އަންނަ ކަމަށެވެ.
ޑރ. އަރުވިންދު ވިދާޅުވީ ކޮވިޑް-19 ކޮންޓްރޯލްކުރުމުގެ ގޮތުން ރާއްޖެއިން ގެންގުޅޭ ސިޔާސަތުތަކުގެ ނަތީޖާ މިހާރު ފެންނަން ފަށާފައިވާ ކަމަށެވެ. އަދި ވިދާޅުވީ މިހާރު ކުރަމުން އަންނަ ގޮތަށް މަސައްކަތް ކުރިއަށް ގެންދިއުމަށް އެހީތެރިވުމުގެ ގޮތުން އިތުރަށް ޓެސްޓް ކިޓް ރާއްޖެއަށް ގެނައުމުގެ މަސައްކަތް ކުރަމުން އަންނަ ކަމަށެވެ.
ރާއްޖެއިން ކޮވިޑް-19 އާ ދެކޮޅަސް ކުރަމުންދާ މަސައްކަތުގައި ދުނިޔޭގެ ސިއްހަތު ޖަމިއްޔާއިން އަންނަނީ އެކި ގޮތްގޮތުން އެހީތެރިކަން ފޯރުކޮށްދެމުންނެވެ. އެގޮތުން ފަންނީ އެހީތެރިކަމުގެ އިތުރުން އެކި ސަރަހައްދުތަކުގައި ޓެސްޓް ކުރެވޭނެ އިންތިޒާމު ހަމަޖައްސައިދިނުމަށް ދަނީ މަސައްކަތްކުރަމުންނެވެ.
