ކޮވިޑާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ސަޕޯޓަރުން ނުވައްދާ ކުޅެނިކޮށް، މެސީއާއި އެކު ސެލްފީއެއް ނަގަން، ދަނޑުގެ ފެންސު މަތިން ޒުވާނަކު ފުންމާލައިފިއެވެ. މިކަން ހިނގާފައިވަނީ ހޮނިހިރު ދުވަހުގެ ރޭ ބާސެލޯނާއާއި މަޔޯކާ ކުޅުނު މެޗުގެ ތެރެއިންނެވެ. މިއީ ކޮވިޑާ ގުޅިގެން މެދު ކަނޑާލި ފަހުން ބާސާއިން ކުޅުނު ފުރަތަމަ މެޗެވެ.
Advertisement
މެސީއާ އެކު ފޮޓޯއެއް ނަގަން ދަނޑަށް އެރި އެ ޒުވާނާ ހުރީ އާޖެންޓީނާގެ ޖޯޒީއެއް ލައިގެން، ފަހަތުގައި ދިހަ ނަންބަރާއެކު މެސީގެ ނަން ޖަހައިގެންނެވެ. މެސީއާ ދިމާލަށް ދިޔުމުގެ ކުރިން ފޯން ހިފައިގެން މި ޒުވާނާ އެންމެ ފުރަތަމަ ދިޔައީ ޖޯޑީ އަލްބާއާ ދިމާލަށެވެ. ސެކިއުރިޓީން އޭނާ ހިފަހައްޓައި ދަނޑުން ނެރުނު ފަހުން އޭނާވަނީ އެ ކަން ހިނގައިދިޔަ ގޮތް ކިޔައިދީފައެވެ.
އަހަރެންނަކީ ފްރާންސް މީހެއް. އަހަރެން އަބަދުވެސް މެސީއަށް ސަޕޯޓުކުރަން. މަޔޯކާގައި މި މެޗު ކުޅެން ހަމަ ޖެހުނިއްސުރެ އަހަރެން އައީ މެސީއާއި އެކު ފޮޓޯއެއް ނެގޭނެ ގޮތަކާ މެދު ވިސްނަމުން. އަހަރެންނަށް މެސީއާ އެކު ފޮޓޯއެއް ނެގުނު. އެކަކު ސެކިއުރިޓީ މީހުން އެ ފޮޓޯ އަހަރެންގެ ފޯނުން ޑިލީޓްކޮށްލައިފި.
ރައްކާތެރިކަމުގެ ފިޔަވަޅެއްގެ ގޮތުން ސަޕޯޓަރުން ނުވައްދާ ކުޅެމުން ދިޔަ މި މެޗުގެ އޭނާ ދަނޑަށް އެރީ ފަންސާސް ދެވަނަ މިނިޓްގައެވެ. މި މެޗު ހަތަރު ލަނޑު ސުން ލަނޑުން ކާމިޔާބުކުރީ ބާސެލޯނާއެވެ. މި މެޗުގައި މެސީ ގޯލުވެސް ޖެހިއެވެ.
