ރައީސުލްޖުމްހޫރިއްޔާ މިނިސްޓަރު އަސްލަމަށް ރުހުން ހޯދުމަށް މަޖިލީހަށް ފޮނުވި އެ މައްސަލަ ވަނީ މާދަމާ ހެނދުނު 9:00 ގައި ފަށައި ޖަލްސާއަށް އެޖެންޑާކޮށްފަ އެވެ.
ޕްލޭނިން، ހައުސިން މިނިސްޓްރީއަށް މިނިސްޓަރު އަސްލަމް އައްޔަން ކުރެއްވީ މިއަދެވެ. އެގޮތުން އަސްލަމަށް މަގާމުގެ ފަތްކޮޅު އެރުވުމާއި ހުވާ ކުރުމުގެ ރަސްމިއްޔާތު ވަނީ މިއަދު ރައީސް އޮފީހުގައި ކުރިއަށް ގެންގޮސްފަ އެވެ.
މިސަރުކާރުގައި ހައުސިން މިނިސްޓްރީ އާއި ޕްލޭނިން މިނިސްޓްރީ ދެ މިނިސްޓްރީ އެއްގެ ގޮތުގައި ހިންގަމުން އައި އިރު ހައުސިން މިނިސްޓަރަކަށް ހުންނެވީ އައިމިނަތު އާތިފާ އެވެ. އަދި ޕްލޭނިން މިނިސްޓަރަކަށް ހުންނެވީ އަސްލަމް އެވެ.
އާތިފާ ހައުސިން މިނިސްޓަރު ކަމުން އިސްތިއުފާ ދެއްވުމާއި ގުޅިގެން ރައީސް އިބްރާހިމް މުހައްމަދު ސޯލިހް ވަނީ ހައުސިން މިނިސްޓްރީ އުވާލައްވައި، ޕްލޭނިން މިނިސްޓްރީގެ ނަން މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާގެ ނަމަށް ބަދަލުކޮށްފަ އެވެ.
އެއާއެކު ހައުސިން މިނިސްޓްރީން ކުރަމުން އައި މަސައްކަތް ޕްލޭނިން، ހައުސިން މިނިސްޓްރީގެ ދަށަށް ބަދަލުވެ، ތަނުގެ މުވައްޒަފުން ވެސް އެ މިނިސްޓްރީގެ ދަށުން މަސައްކަތް ކުރާނެ ކަމަށް ރައީސް އޮފީހުން ބުނެ އެވެ.
