މިއަދު މެންދުރުފަހު އޮތް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒް ކޮމިޓީގައި ވެލާނާ އެއާޕޯޓު ހިންގާ ކުންފުނީގެ ޓާމިނަލް މެނޭޖަރު އިބްރާހިމް ހުސައިން ވިދާޅުވީ ރާއްޖެއަށް އައުމަށް މިހާތަނަށް 10 އެއާލައިނަކުން އެދިފައިވާއިރު އޭގެ ތެރޭފައި ސްރީލަންކަން އާއި އެމިރޭޓްސް އަދި އިންޑިގޯ އާއި ގަތަރު އެއާލައިންސް ފަދަ އެއާލައިންތަކަކުން ކަމަށެވެ. 

އޭގެ އިތުރުން ޑޮމެސްޓިކް ވެސް ދުވާލަކު، 15-20 ފްލައިޓް ޖައްސާނެ ކަމަށް ބެލެވޭ ކަމަށް ވިދާޅުވި އެވެ. 

އޭގެ އިތުރުން ކޮމިޓީގައި އެމްއޭސީއެލްގެ އެކްޓިން މެނޭޖިން ޑިރެކްޓަރު މޫސާ ސޯލިހު ވިދާޅުވީ ހާލަތަށް އަންނަ ބަދަލުތަކާއެކު އެއާޕޯޓުގައި ޖައްސައި ބައިނަލްއަގްވާމީ އެއާލައިންތަކުގެ އަދަދު އިތުރު ނުވަތަ މަދު ވެސް ވެދާނެ ކަމަށެވެ. 

ސޯލިހު ވިދާޅުވީ އެއާޕޯޓް ހުޅުވާލާއިރު ރާއްޖެއަށް އަންނާނެ ފަތުރުވެރިންގެ އަދަދުވެސް ބުނަން ސީދާ ނޭނގޭ ކަމަށެވެ، އެގޮތުން ޖުލައި 15 ގައި ބޯޑަރު ހުޅުވާނެ ކަމަށް ބަލައިގެން ތިބިއިރު އޮގަސްޓު މަހަށް ފަސްވުމަކީ ވެސް އެކަށީގެންވާ ކަމެއް ކަމަށް ވެސް ވިދާޅުވި އެވެ. 

ސޯލިހު އިތުރަށް ވިދާޅުވީ ރައްކާތެރިިކަމުގެ ފިޔަވަޅުތަކާއެކު ހުޅުވާލުމަށް މިހާރު ވެސް އެމްއޭސީއެލުން އޮތީ ތައްޔާރަށް ކަމަށެވެ. 

ނިއު ނޯމަލްގައި އެއާޕޯޓު ހުޅުވާއިރު ހަތަރު ގަޑިއިރުކުރިން އެއާޕޯޓަށް ދާން ޖެހޭއިރު އެއާޕޯޓް އިމަޖެންސީ ސާވިސްގެ ޑެޕިއުޓީ ޗީފް އޮފިސަރު، އަހުމަދު ފަޔާޒު ކޮމިޓީގައި ވިދާޅުވީ އެއާޕޯޓް ހުޅުވާއިރު އިމަޖަންސީ ހާލަތެއް ދިމާވެދާނެ ކަމަށް ބަލައި އެކަމަށް ވެސް އޮތީ ތައްޔާރަށް ކަމަށެވެ. 

އަދި ވިދާޅުވީ ޓާމިނަލްގައި ސޯޝަލް ޑިސްޓެންސިން މާކުތައް ވެސް ހަދާފައިވާއިރު އެއާޕޯޓުގެ އަށް ސަރަހައްދެއްގައި ތާމަލް ކެމެރާތައް ވެސް ބަހައްޓާފައިވާ ކަމަށެވެ.