ފުލުހަށް ހާޒިރުވުމަށް ޗިޓް ފޮނުވިކަން ހައިލަމް ހިއްސާކުރެއްވީ ޓްވީޓާ މެދުވެރިކޮށެވެ. އެ ޓްވީޓާއެކު އޭނާ ވަނީ ބިރު ނުދެއްކޭނެ ކަމަށް ވެސް ވިދާޅުވެފަ އެވެ.
މާދަމާ ރޭ 20:00 ގައި ފުލުހަށް ހާޒިރުވުމަށް އޭނާއަށް އަންގަވާފައިވާއިރު، އޭގައި ވަނީ މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން ފައިނޭޝަލް އިންޓެލިޖެންސް ޔުނިޓަށް ލިބިފައިވާ މައުލޫމާތުގެ ރިޕޯޓް ބެލިބެލުމުން ހައިލަމްގެ އެކައުންޓަށް ފައިސާ ޖަމާވެފައިވާކަން އެނގޭ ކަމަށެވެ.
އެ ޗިޓުގައިވާ ގޮތުން، އަލްހާން ފަހުމީ، މިދިޔަ އަހަރުގެ މެއި މަހުގެ 19 ވަނަ ދުވަހު، ދެ ލައްކަ ރުފިޔާގެ މުއާމަލާތެއް ހިންގާފައިވާ ކަމަށް ފާހަގަކުރެވި އެކަން ފުލުހުންގެ ސަމާލުކަމަށް ގެނެސްފައިވާތީ އަދި އެ މުއާމަލާތަކީ މަނީ ލޯންޑަރިންއަށް ތުހުމަތު ކުރެވޭ ގޮތަށް ހިންގާފައިވާ މުއާމަލާތެކެވެ.
އެގޮތުން ފުލުހުން ހައިލަމްގެ މައްޗަށް ކުރާ ތުހުމަތަކީ ކްރިމިނަލް ކޯޓުގެ ފަނޑިޔާރުގެ މަގާމު ފުރުއްވިއިރު އެ މަގާމުގައި ހުރެގެން ވިޔަފާރިކޮށްފައިވާ ކަމަށެވެ.
ކްރިމިނަލް ކޯޓުގެ އިސް ގާޒީގެ މަގާމުން ހައިލަމް އިސްތިއުފާ ދެއްވީ މިދިޔަ ޑިސެމްބަރު މަހުގެ ތިން ވަނަ ދުވަހު އެވެ. އެގޮތުން މަގާމުން އިސްތިއުފާ ދެއްވީ އޭނާގެ މައްޗަށް ސުލޫކީ މައްސަލައެއް ސާބިތުވާ ކަމަށް ނިންމާ ޖުޑީޝަލް ސާވިސް ކޮމިޝަނުން އޭނާ މަގާމުން ވަކިކޮށްދިނުމަށް އެދި މަޖިލީހަށް ވެސް ހުށަހަޅާފައިވަނިކޮށެވެ.
