Advertisement

ސެންޓަ ފޯ ހަޔަ ސެކަންޑަރީ އެޑިޔުކޭޝަން (ސީއެޗްއެސްއީ)އަށް ދިމާވެފައިވާ ޖާގައިގެ ދަތިކަން ހައްލުކުރުމަށްޓަކައި 8 ބުރީގެ އިމާރާތެއް އެޅުމުގެ މަސައްކަތް ކުރިއަށްދާ ކަމަށް އެޑިޔުކޭޝަން މިނިސްޓްރީން ބުނެފި އެވެ.

ސީއެޗްއެސްއީގެ އާ އިމާރާތް އަޅަނީ އެންމެ ފުރަތަމަ އެ ސްކޫލު ހުޅުވިއިރު ހުރި ދެ ބުރި އިމާރާތް ހުރި ތަނުގަ އެވެ. ރެނދުލާއި ބާވެފައި ހުރި އެ އިމާރާތް ތަޅާލައި މިހާރު ވަނީ ބިން ސާފުކޮށްފަ އެވެ.

އެޑިޔުކޭޝަން މިނިސްޓްރީން މިދިޔަ އޮކްޓޫބަރު މަހުގެ 16 ވަނަ ދުވަހު ވަނީ 30 މިލިއަން ރުފިޔާގެ އާ އިމާރާތުގެ މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާ ހަވާލުކޮށްފަ އެވެ. އެމަސައްކަތް ހަވާލުކޮށްފައިވަނީ 420 ދުވަހުގެ ތެރޭގައި މަސައްކަތް ނިންމާ ގޮތަށެވެ.

އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު އަހްމަދު ރިޔާޒު މިއަދު ސީއެންއެމްއަށް ވިދާޅުވީ އާ އިމާރާތެއް އެ ސްކޫލުގައި އެޅި ނަމަވެސް މިހާރު ބޭނުން ކުރަމުން އަންނަ އިމާރާތް ވެސް ކިޔަވައިދިނުމަށް ބޭނުން ކުރާނެ ކަމަށެވެ.

އެންމެ ފުރަތަމަ ސްކޫލު ހުޅުވިއިރު ހުރި ދެ ބުރި އިމާރާތް، ބާވެ ވަރަށް ބޮޑަށް ހަލާކުވެފައިވާތީ އެތަނަކީ ރައްކާތެރި ތަނެއް ނޫން ކަމަށް އެމްއެންޑީއެފުން އެންގުމާއެކު މީގެ ހަތަރު ވަރަކަށް އަހަރު ކުރިން ވަނީ އެތަނުގައި ކިޔަވައިދިނުން ހުއްޓާލާފަ އެވެ. އެހެންވެ، 1500 ދަރިވަރުން ކިޔަވަމުން އަންނަ އެ ސްކޫލަށް ވަނީ ޖާގައިގެ ދަތިކަން ވަރަށް ބޮޑަށް ކުރިމަތިވެފަ އެވެ. އެހެންނަމަވެސް އަށް ބުރީގެ އިމާރާތާއެކު ޖާގައިގެ ދަތިކަން ހައްލުކުރެވި އިތުރު ދަރިވަރުންނަށް ވެސް އެތަނުގައި ކިޔަވަން ފުރުސަތު ދެވޭނެ ކަމަށް ރިޔާޒު ވިދާޅުވި އެވެ.