Advertisement

މާލޭ ސިޓީގެ ސްކޫލުތަކަށް ދިމާވެފައިވާ ޖާގައިގެ ދަތިކަން ހައްލުކުރުމަށްޓަކައި މާލޭގައި ހުޅުވާ އިއްޒުއްދީން ސްކޫލަށް ދަރިވަރުން ރަޖިސްޓްރީ ކުރުން މިއަދު ހުޅުވާލައިފި އެވެ.

އިއްޒުއްދީން ސްކޫލުގެ ނަމުގައި އާ ސްކޫލެއް ހުޅުވަން ނިންމާފައިވަނީ މާލޭ އިންގްލިޝް ސްކޫލު (އެމްއީއެސް) ކުރިން ހިންގި އިމާރާތުގަ އެވެ.

އެޑިޔުކޭޝަން މިނިސްޓްރީން ބުނީ އިއްޒުއްދީން ސްކޫލުން އަންނަ އަހަރަށް ޖާގަ ލިބިފައިވާ ދަރިވަރުން ރަޖިސްޓްރީ ކުރުން މިއަދު ހެނދުނު 8:30 ގައި ފަށާފައިވާ ކަމަށެވެ. އެގޮތުން ރަޖިސްޓްރީ ކުރުމުގެ ކަންކަން ކޮންމެ ރަސްމީ ދުވަހެއްގެ ހެނދުނު 8:30 އިން މެންދުރު 1:00 އަށް ކުރިއަށްދާނެ ކަމަށް މިނިސްޓްރީން ބުނެ އެވެ.

މިނިސްޓްރީން ބުނި ގޮތުގައި ރަޖިސްޓްރޭޝަން ފޯމު މިނިސްޓްރީގެ ވެބްސައިޓުން އަދި ވެލާނާ ބިލްޑިންގެ، 8 ވަނަ ފަންގިިލާގައި ހުންނަ މިނިސްޓްރީގެ ވެބްސައިޓުން ވެސް ލިބޭނެ އެވެ.

އެޑިޔުކޭޝަން މިނިސްޓްރީން ބުނީ އަންނަ އަހަރު އެ ސްކޫލުގައި ކިޔަވައިދޭނީ ގްރޭޑު އެކަކުން ހަ އަކަށް ކަމަށާއި ގްރޭޑު ހަތަކުން 10 އަކަށް ކިޔަވައިދޭން ފަށާނީ 2021 ވަނަ އަހަރުން ފެށިގެން ކޮންމެ އަހަރަކުވެސް ގްރޭޑެއް އިތުރުކޮށްގެން ކަމަށެވެ.

މިނިސްޓްރީން ބުނީ އެތަނުގައި ކިޔަވައިދޭނީ އެއް ދަންފަޅިއަށް ކަމަށެވެ.

މީގެއިތުރުން މިނިސްޓްރީން ބުނީ އެ ސްކޫލަަށް ދަރިވަރުން ވެއްދުމުގައި ވެސް އަމަލުކުރާނީ މާލޭގެ އެހެން ސްކޫލުތަކަށް ވެސް ދަރިވަރުން ވެއްދުމުގައި އަމަލުކުރަމުން އަންނަ އުސޫލުގެ ދަށުން ކަމަށެވެ. އަދި ސްކޫލުގައި ކިޔެވުމަށް ޖާގަ ދޭނީ އެކަމަށް އެދި ހުށަހަޅާ ތަރުތީބުން ކަމަށްވެސް މިނިސްޓްރީން ބުނެ އެވެ.