ސަފާރީއެއްގައި ބިދޭސީ އަންހެނަކު ރޭޕްކުރި މައްސަލައާ ގުޅިގެން ހައްޔަރުކުރި މީހުން ދޫކޮށްލުމުން ފުލުހުންނަށް ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް، ވަރަށް ބޮޑަށް ފާޑުވިދާޅުވެއްޖެ އެވެ.
Advertisement
ސަފާރީގައި ބިދޭސީ މީހާ ރޭޕްކުރި ކަމަށް ބުނާ މައްސަލައާ ގުޅިގެން ތަފާތު އެކި އަޑުތައް އަރަމުންދާތީ އެކަން ހިނގި ގޮތް ބަޔާންކޮށް މިރޭ ފުލުހުން ވަނީ ބަޔާނެއް ނެރެފަ އެވެ.
އެކަމާއި ގުޅިގެން މިރޭ ހައިލަމް ވަނީ ފުލުހުންގެ ބަޔާނުގައި ސަފާރީ ތެރޭގައި ނުރުހުމުގައި ޖިންސީ ގޯނާކުރި ކަމާއި، ސަލާމަތްވުމަށް މޫދަށް ފުންމާލުމުން ޑިންގީއެއްގައި ގެނެސް ޖެޓީއަށް ބޭލީކަމަށް ފާހަގަކުރާ ކަމަށް ވިދާޅުވެފަ އެވެ.
އެގޮތުން ވިކްޓިމްއާއެކު ފަތިހު، 17:00 ފެނުމުން ތުހުމަތުކުރަން އެވަރު ކާފީ (ފުދޭ މިންވަރު) ނުވަނީތޯ ހައިލަމް ސުވާލު އުފެއްދެވި އެވެ. އަދި ކޯޓަށް ނުގެންދިޔައީ ކީއްވެތޯ ވެސް ސުވާލު އުފެއްދެވި އެވެ.
"ތުހުމަތުކުރެވޭ ފަރާތްތައް ފެނުނީ ވިކްޓިމްއާއެކު ފަތިހު 5:00 ތުހުމަތުކުރަން މިވަރު ކާފީ ނުވަނީ؟ ކޯޓަށް ނުގެންދިޔައީ ކީއްވެތޯ؟" ހައިލަމް ވިދާޅުވި އެވެ.
އެ ބަޔާނުގައި ބުނީ ޖޫން 25 ވަނަ ދުވަހުގެ ރޭ ހުޅުމާޅެ ފަޅުގައި އަޅާފައި އޮތް ސަފާރީއެއްގައި ރާއްޖޭގައި މަސައްކަތްކުރާ ބިދޭސީ އަންހެނަކަށް ގަދަކަމުން ޖިންސީ ގޯނާކުރި މައްސަލައެއް ފުލުހުންނަށް ހުށައަޅާފައި ވަނީ ޖޫން 26 ވަނަ ދުވަހުގެ ފަތިހު 05:00 ގައި ހުޅުމާލެ ލަކުޑި ޖެޓީ ސަރަހައްދުގައި އެ އަންހެން މީހާ އާއި އިތުރު ދެ ފިރިހެނަކު ތިއްބާ ފުލުހުން އެތަނަށް ގޮސް މައުލޫމާތު އޮޅުންފިލުވުމުން ކަމަށެވެ.
ފުލުހުން ބުނީ އެ ސަރަހައްދުގައި އެމީހުން ތިއްބާ ފުލުހުން ގޮސް މައުލޫމާތު އޮޅުން ފިލުވުމުން އެ އަންހެން މީހާގެ ފަރާތުން މައުލޫމާތު ދީފައި ވަނީ، ޖޫން 25 ވަނަ ދުވަހުގެ ރޭ ރައްޓެއްސެއްގެ ދައުވަތަކަށް، މައްސަލާގައި ތުހުމަތު ކުރެވޭ ދެ މީހުންނާއި އެކު ސަފާރީ އަކަށް ގޮސް ވަގުތު ހޭދަކޮށްފައި ވާކަމަށެވެ.
އަދި އެ ދެ މީހުން ސަފާރީ ތެރޭގައި އޭނާގެ ނުރުހުމުގައި އޭނާގެ ގައިގައި އަތްލާ ޖިންސީގޯނާ ކުރިކަމަށާއި، އެމީހުންގެ އަމަލުތައް ހުރިގޮތުން އެފަދަ އަމަލެއް ތަކުރާރުކޮށްފާނެތީ ސަލާމަތްވުމުގެ ގޮތުން މޫދަށް ފުންމާލުމުން ޑިންގީއެއްގައި އެ ދެމީހުން އައިސް އޭނާ ޑިންގީއަށް ނަގައިގެން ގެނަސް ޖެޓީ އަށް ބޭލި ކަމަށެވެ.
އެކަން ފުލުހުންނަށް ހުށައެޅުމުން، އެތަނުގައި ތިބި ދެ ފިރިހެނުން އެވަގުތު ފުލުހުންގެ ބެލުމުގެ ދަށަަށް ގެންގޮސްފައި ވަނީ، އެއީ ދެމިގެންދިޔަ ކުށުގެ ވެއްޓެއް ކަމަށް ވާތީ ކަމަށް ފުލުހުން ބުނެ އެވެ.
ފުލުހުން އެ މީހުން ދޫކޮށްލީ ތަހުގީގަށް ހައްޔަރުކޮށްފައި ބެހެއްޓޭނެ އެކަށީގެންވާ ސަބަބެއް، ނެތުމުން ކަމަށް ބުނެ އެވެ.
