މިރޭ އެންއީއޯސީގެ އެންމެ ފަހު ޕްރެސް ބާއްވާފައިވާއިރު މިއީ އެގޮތަށް މަބްރޫކް ވެސް ބައްދަލުކުރި ފަހު ރެ އެވެ. މިއަދުން ފެށިގެން އެންއީއޯސީ، ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) ގެ ނަމުގައި ހިންގަމުންދާނީ ހެލްތު މިނިސްޓްރީގެ ބެލުމުގެ ދަށުންނެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ހެލްތު މިނިސްޓަރު އަބްުދުﷲ އަމީން ވިދާޅުވި ގޮތުގައި އެޗްއީއޯސީއަށް އާ ތަރުޖަމާނަކު ހަމަޖައްސަވާނެ އެވެ.
މި ނޫސްވެރިންގެ ބައްދަލުވުމުގައި ނޫސްވެރިން ވަނީ މިވީ ތިން މަހެއްހާ ދުވަހު ނޫސްވެރިންނާއި އެހާ ގާތުން މަސައްކަތްކުރުމަށް ފަހު މަބްރޫކްއާ، ދެން އެފަދަ ޕްރެސްއަކުން ބައްދަލުނުވާނެކަން އެނގުމުން އެކަން ފާހަގަކުރި އެވެ. އަދި ވަރަށް މަބްރޫކް "މިސް" ވާނެ ކަމަށް ވެސް ބުންޏެވެ.
ކޮންމެއަކަސް، އެންމެ ފަހު ފަހަރު، ނޫސްވެރިންނާއި ބައްދަލުކުރައްވަމުން މަބްރޫކް ވަނީ، ކުރިއެކޭ އެއްގޮތަށް މުހިއްމު ވާހަކަތަކެއް ހިއްސާކުރައްވާފަ އެވެ. އެގޮތުން ކޮވިޑް-19 ގެ މި ނުަރައްކާތެރި ހާލަތުން އަރައިގަނެވޭނީ އެންމެން ގުޅިގެން މަސައްކަތްކޮށްގެންކަމުން އެކަމުގެ މައުލޫމާތު އެންމެނަށް ހިއްސާކުރުން މުހިއްމުކަން ފާހަގަކުރެއްވި އެވެ.
މަބްރޫކް ވިދާޅުވީ މިދިޔަ ހަތަރު މަހެއްހާ ދުވަހު 164 ޕްރެސް ކޮންފަރެންސް އެންއީއޯސީން ބާއްވާފައިވާ ކަމަށާއި އޭގެ ތެރެއިން 111 ޕްރެސްއެއްގައި އޭނާ ބައިވެރިވެވަޑައިގެންނެވި ކަމަށެވެ. އަދި 1200 އަށް ވުރެ ގިނަ ސުވާލަށް ޖަވާބުދެއްވާފައިވާ ކަމަށް ވެސް ވިދާޅުވި އެވެ. އޭގެ އިތުރުން މަބްރޫކް ވިދާޅުވީ، އެ ޕްރެސްތަކުގެ ބޭރުން ވެސް ނޫސްވެރިންގެ 600 އެއްހާ ސުވާލަށް ޖަވާބުދެވިފައިވާ ކަމަށެވެ.
މަބްރޫކް ވަނީ އޮންލައިންކޮށް ޕްރެސްތައް ބާއްވަން ފެށުމާއެކު، އަތޮޅު ތެރޭގެ ނޫސްވެރިންނާއި ރާއްޖެއިން ބޭރުގައި ތިބި ނޫސްވެރިންނަށް ވެސް އެ ޕްރެސްތަކުގައި ބައިވެރިވެވޭނެ އިންތިޒާމު ހަމަޖެހިގެން ދިއުމަކީ ލިބުނު ބޮޑު އުފަލެއް ކަމަށް ވިދާޅުވެފަ އެވެ.
އޭގެ އިތުރުން މަބްރޫކް ވަނީ، އެންމެ ފުރަތަމަ ބަލި ފެތުރިގެން އައިއިރު ޑޮކްޓަރުން ވަނީ ލައްކައެއްހާ މީހުންނަށް ބަލި ޖެހޭނެ ކަމަށް އަންދާޒާކޮށްފައި ކަމަށާއި އެކަމަކު ފަހުން ރާއްޖޭގެ ހާލަތަށް ބަލާއި 26000 މީހަކަށް ބަލި ޖެހޭނެ ކަމަށް އަންދާޒާކުރި ކަމަށެވެ.
އެކަމަކު ހަތަރު މަސްވީއިރު ވެސް ބަލި ޖެހުނު މީހުންގެ އަދަދު އުޅެނީ 2300 އެއްހާ މީހުންގައިކަން ފާހަގަކުރައްވާ މަބްރޫކް ވަނީ އެ އަދަދު އިތުރުނުވީ ދިވެހި ރައްޔިންގެ ސަބަބުން ކަމަށް ވެސް ވިދާޅުވެފަ އެވެ. އެގޮތުން ޑޮކްޓަރުން ދެއްވި ވާހަކަތަކުގެ އަޑުއެހީތީ މަބްރޫކް ވަނީ ޝުކުރު އަދާކުރައްވާފަ އެވެ.