ސޮނާކްޝީ ބުނި ގޮތުގައި ސްކޫލުގައި އުޅޭ ފިރިހެން ކުދިން، އޭނާއަށް ތަފާތު ނަން ނަމުން މުހާތަބުކުރިކަމަށެވެ. އެކަމަކު އެކަންކަމަށް އޭނާ އެހާ ބޮޑު ސަމާލުކަމެއް ދީފައި ނުވާނެ ކަމަށް ބުނެ އެވެ.
ސޮނާކްޝީ ބުނީ އޭނާ ބޮލީވުޑަށް ތައާރަފުވި ފިލްމު، "ދަބަންގް" ގައި މަސައްކަތް ކުރުމަށް 30 ކިލޯ ލުއިކޮށްލެވުމުން ވަރަށް ފަހުރުވެރިވި ކަމަށެވެ. އަދި އެއީ ހާސިލުކުރެވުނު ވަރަށް ބޮޑު ކަމެއް ނަމަވެސް އެވަރުން ވެސް މީހުން އޭނާ ހުންނަ ގޮތަށް ފާޑުކިޔާ ހެދި ކަމަށެވެ.
އެކަމަކު ފަހުން މީހުން އެގޮތަށް ކިޔަސް، އަމިއްލަ މީހާ ގަބޫލުކުރީ، އެމީހުންނަށް ބޮލީވުޑުގައި މަސައްކަތް ކުރަން ނުލިބި އޭނާއަށް މަސައްކަތް ކުރަން ލިބުމަކީ ކޮންމެވެސް ހާއްސަ ކަމެއް އޭނާގެ ކިބައިގައި ހުރުމުން ކަމަށެވެ.
ސޮނާކްޝީ ބުނީ 18 އަހަރުވުމުން ހިކުމަށްޓަކައި އޭނާ ވެސް ޖިމަށް ދިޔަ ކަމަށާއި އެކަމަކު އެހެން މީހުންހެން އޭނާއަށް 30 ސިކުންތު ވެސް ކަސްރަތު ނުކުރެވޭ ކަމަށެވެ. މީހާ ލޮޑުވެ ހިތްވަރު ވެސް އެލޭ ގޮތްވި އެވެ. އެކަމަކު އެކަން ދޫކޮށްލަން ބޭނުން ނުވީ އޭނާ ހިކުމަށް ބޭނުންވެފައިވާ މިންވަރުގެ ބޮޑު ކަމުން ކަމަށް ވެސް ބުންޏެވެ.
އުމުރުން 33 އަހަރުގެ ސޮނާކްޝީ ވަނީ އަކީރާ އާއި މިޝަން މަންގަލް އަދި ކަލަންކް އާއި ފޯސް2 އިން ވެސް ފެނިގެންގޮސްފަ އެވެ.
