ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ޔައުގޫބު ވިދާޅުވީ މަޖިލީހަށް މިއަދުގެ ޖަލްސާއަށް ހުށަހެޅިފައިވާ ކުރިމިނަލް ކޯޓުގެ ކުރީގެ ގާޒީ ހަސަން ނަޖީބުގެ ތަހުގީގު ރިޕޯޓުން އެނގުނު ގޮތުގައި ނަޖީބުއާއި އެކު ސިޔާސީ ހަރާކާތްތަކުގައި ބައިވެރިވި ފަނޑިޔާރުންނަކީ ހައިކޯޓުގެ އިސް ފަނޑިޔާރު ޝުޖާއު އުސްމާނުގެ އިތުރުން ސުޕްރީމް ކޯޓުގެ ކުރީގެ ފަނޑިޔާރު ޢަބްދުﷲ ދީދީ ކަމަށެވެ.
ޢަބްދުﷲ ދީދީ މިހާރުވަނީ މަގާމުން ވަކިކޮށްފައެވެ. ޔައުގޫބު ވިދާޅުވީ، ނަޖީބުއާ އެކު ސިޔާސީ ހަރަކާތްތަކުގައި ބައިވެރިވި ޝުޖާޢު އުސްމާނުވެސް މަގާމުން ވަކިކުރަން ޖެހޭ ކަމަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހެޅިފައިވާ، ނަޖީބުގެ ތަހުގީގު ރިޕޯޓާ ގުޅޭ ގޮތުން ވާހަކަ ދައްކަވަމުން މެންބަރު ޔައުގޫބު ވަނީ ހުވަދު އަތޮޅަށް ނިސްބަތްވާ ފަނޑިޔާރުންތަކެއްގެ ސުލޫކީ މައްސަލައާއި ގުޅިގެން އަތޮޅަށް ލިބިފައިވާ ހުތުރު ނަމަށް މާފަށް އެދިވަޑައިގެންފައެވެ.
ޔައުގޫބު ވިދާޅުވީ، މި ޤައުމު ޚަރާބުގެ މަގަށް ގެންދިއުމުގައި ހުވަދޫގެ ގިނަ ރައްޔިތުންނާ ދެކޮޅަށް ޖުޑީޝަލް ދާއިރާގައި ހިމެނޭ މަދު ބަޔަކު ބައިވެރިވެފައިވާ ކަމަށެވެ.
ޝުޖާއު އުސްމާނު މަގާމުން ވަކި ކުރަން ޖެހޭ ކަމަށް ޔައުގޫބު ވިދާޅުވެފައިވާއިރު، ޖުޑީޝަލް ސަރވިސް ކޮމިޝަނުން އަންނަނީ ޝުޖާޢު އުސްމާނާ ގުޅޭ ގިނަ މައްސަލަތަކެއް ބަލަމުންނެވެ. އޭގެ ތެރޭގައި ޔައުގޫބު ވިދާޅުވި ފަދައިން ސިޔާސީ ހަރަކާތްތަކުގައި ޝުޖާއު ބައިވެރިވެފައިވާ މައްސަލަވެސް ހިމެނެއެވެ.
