އެރަށުން އިއްޔެ މި ބައްޔަށް ޕޮޒިޓިވްވީ ހޯމް ކަރަންޓީނަށް މިމަހުގެ ހަ ވަނަ ދުވަހު ރަށަށް ދިޔަ ފިރިހެނެކެވެ.
އެރަށު ކައުންސިލުގެ ރައީސް އިބްރާހީމް ރަޝީދު މިރޭ ސީއެންއެމްއަށް ވިދާޅުވި ގޮތުގައި އެމީހާ، ހޯމް ކަރަންޓީނުގައި ހުރީ އޭނާގެ އާއިލާގެ އިތުރު ދެ މީހުންނާއެކު ކަމުން، އެމީހުން ވަނީ ބައްޔަށް ޓެސްޓްކޮށްފަ އެވެ. އަދި އޭގެ ތެރެއިން އިތުރު ފިރިހެނަކު ބައްޔަށް ޕޮޒިޓިވްވެފައިވާ ކަމަށް ވިދާޅުވި އެވެ.
ކައުންސިލުގެ ރައީސް ވިދާޅުވި ގޮތުގައި ޕޮޒިޓިވްވި އެއްވެސް މީހެއްގެ ގައިން ބަލީގެ އަލާމާތް ފެނިފައެއް ނުވެ އެވެ.
ޕޮޒިޓިވްވީ އެއް ގެއެއްގެ ދެ މީހުންކަން ފާހަގަކުރައްވާ، އިބްރާހީމް ރަޝީދު ވިދާޅުވީ، އެމީހުން މިހާރު ވެސް ތިބީ ހޯމް ކަރަންޓީނުގައި ކަމަށެވެ.
އެރަށުން އެންމެ ފުރަތަމަ ޕޮޒިޓިވްވި މީހާއަކީ މާލެއިން ފުރުމުގެ ކުރިން ނެގި ރެންޑަމް ސާމްޕަލަކުން ބަލި ޖެހިފައިވާކަން އެނގުން މީހެކެވެ. ސާމްޕަލްގެ ނަތީޖާ ލިބިފައި ވަނީ އެމީހާ ރަށަށް ދިޔަ ފަހުންނެވެ.
މިރޭ އިބްރާހީމް ރަޝީދު ވަނީ އެކަމުގެ ނުރުހުން ވެސް ފާޅުކުރައްވާފަ އެވެ. އެގޮތުން ހެލްތު ޕްރޮޓެކްޝަން އެޖެންސީން އެމީހުންގެ ނަތީޖާ ލިބުމުގެ ކުރިން ހޯމް ކަރަންޓީނަށް ފޮނުވުމުން އެކަމާއި ކަންބޮޑުވުން ފާޅުކުރެއްވި އެވެ.
މީގެ ކުރިން ވެސް ހޯމް ކަރަންޓީނަށް ފޮނުވި މީހުން ކޮވިޑް-19 އަށް ޕޮޒިޓިވްވެފައިވެ އެވެ. އަދި މީގެ ކުރިން އުތުރުގެ އަތޮޅުން ވެސް އެ ބަލި ފެނިފައިވެ އެވެ. އެކަމަކު ނޮޅިވަރަމުން ބަޔަކަށް ކޮވިޑް ޖެހިފައި މިވަނީ އުތުރުގެ ރަށްރަށުން ބަލި ނައްތާލެވިފައިވަނިކޮށެވެ.
