އެތަން މާދަމާ އަލުން ބަންދުކުރަން ނިންމިއިރު ކޮވިޑް-19 އާ ގުޅިގެން އެންމެ ފުރަތަމަ އެތަން ބަންދުކުރީ މިދިޔަ ޖެނުއަރީ މަހުގެ ފަހުކޮޅުގަ އެވެ. އެކަމަކު ހޮންގްކޮންގައި ބަލި ފެތުރޭ މިންވަރު މަދުވުމާއެކު އެތަން އަލުން ހުޅުވިތާ އަދި މަހެއް ވެސް ނުވެ އެވެ.
ހޮންގްކޮންގައި އަނެއްކާވެސް ކޮވިޑް ފެތުރެން ފަށާފައިވާއިރު ޑިޒްނީއިން ނެރުނު ބަޔާނެއްގައި ބުނީ މާދަމާ ދޮރާށި ބަންދު ކުރަން ނިންމާފައިވަނީ ސަރުކާރާއި ސިއްހީ އިދާރާތަކުން މި ބަލި ކޮންޓްރޯލް ކުރުމަށް އަޅާ ފިޔަވަޅުތަކަށް އެއްބާރުލުން ދިނުމުގެ ގޮތުން ކަމަށެވެ.
ޕާކް ބަންދު ކުރުމުގެ އިތުރުން ރައްކާތެރިކަމުގެ ފިޔަވަޅެއްގެ ގޮތުގައި ބޮޑެތި އެއްވުންތަކާއި، ރެސްޓޯރެންޓްތަކުގައި ތިބެގެން ކެއުމާއި ޖިމްތައް ފަދަ މީހުން ގިނައިން އެއްވާ، ތަންތަން ބަންދުކުރުމަށް ވެސް އެގައުމުގެ ސަރުކާރުން ވަނީ ނިންމާފަ އެވެ.
ހޮންގްކޮންގައި ބަލި ޖެހޭ މީހުންގެ އަދަދު ވަރަށް ބޮޑަށް ކޮންޓްރޯލްކުރެވިފައި އޮތުމަށް ފަހުން އަލުން ގިނަ އަދަދެއްގެ ބަޔަކަށް ބަލި ޖެހި ގައުމުގައި ބަލި ފެތުރިދާނެ ކަމުގެ ބިރު ވަނީ ބޮޑުވެފަ އެވެ. މިހާތަނަށް އެގައުމުން ބަލި ޖެހުނު، މީހުންގެ އަދަދު 1570 އަށް އަރާފައިވާއިރު އެ ބަލީގައި އަށް މީހަކު ވަނީ މަރުވެފަ އެވެ.
