އެމްއެންޑީއެފް އިން ބުނީ ތ. އަތޮޅު ފަރަކަށް އެރި "މިފްކޯ 5" ނަމަކަށް ކިޔާ ދޯންޏެއްގައި ތިބި މީހުންގެ ތެރެއިން ހާލު ބޮޑުވި ދިވެހި ފިރިހެނަކަށް އަވަސް ފަރުވާ ދިނުމަށް ހޮސްޕިޓަލަށް ގެންގޮސްފައިވާ ކަމަށެވެ.
އެމީހާއަށް ސެންޓްރަލް އޭރިޔާ ކޯސްޓް ގާޑް ސްކޮޑުން އެހީތެރިކަން ފޯރުކޮށް ދީފައިވާ ކަމަށާ އިތުރު ފަރުވާ ދިނުމަށް ވޭމަންޑޫއަށް މިއަދު ހަވީރު 5:15 ހާއިރު ގެންގޮސްފައިވާ ކަމަށް އެމްއެންޑީއެފްއިން ބުނެއެވެ.
ސީއެންއެމްއަށް މައުލޫމާތު ދެއްވަމުން މިފްކޯގެ މެނޭޖަރު މުހައްމަދު ދީދީ ވިދާޅުވީ މިފްކޯގެ މުދާ އުފުލާ ދޯންޏެއް އިއްޔެ މެންދުރު އައިކޮޅުގެ އެތެރެވަރިއަށް ވަދެގެން ދަތުރުކުރަނިކޮށް ފަރަކަށް އެރި ކަމަށެވެ. އަދި އެ ތަނަކީ ތިލަ ފަޅެއްކަމުން ފަރުގަ ޖެހި އިތުރަށް އަޑިޔަށް ނުގޮސް ދޯނި އޮތް ކަމަށާއި އެދޯނީގައި ތިބި ނުވަ މީހުން މިހާރު ސަލާމަތް ކުރެވިފައިވާކަމަށް ވިދާޅުވި އެވެ.
ދޯނި ސަލާމަތް ކުރުމަށްޓަކައި މިފްކޯގެ ދެ ބޯޓެއްގެ އިތުރުން ތިމަރަފުށީ ދޯންނެއްވެސް އެސަރަހައްދުގައި ހަރަކާތްތެރިވަމުން އެބަ ދެއެވެ. އަދި އަޑިޔަށް ފެތިފައިވާ ދޯނީގައި ތިބި 9 މީހުން ފެތުނު ދޯނި ސަލާމަތް ކުރުމަށް އައި ދޯންޏަކަށް ނަގާފައިވާ ކަމަށާއި އެމީހުންގެ ހާލު ރަނގަޅު ކަމަށް މީގެ ކުރިން މެނޭޖަރު ވަނީ ވިދާޅުވިއެވެ.
