ކުރިން ޑެޕިއުޓީ އެޓާނީ ޖެނެރަލްގެ މަގާމުވެސް އަދާކުރައްވާފައިވާ ގާނޫނީ ވަކީލު އުޝާމް ވިދާޅުވީ އިސްމާއިލް ރަޝީދުގެ ސުލޫކީ މައްސަލަ އަދި ޝުޖާއު އުސްމާނުގެ ސުލޫކީ މައްސަލަތައް ބެލުމުގައި އަމަލުކޮށްފައިވާ ގޮތަށް ބަލާއިރު ޖޭއެސްސީއިން އިންސާފުވެރިކަމާ ހަމަހަމަކަން އެއްވެސް މިންވަރަކަށް ނުގެންގުޅޭކަން ވަރަށް ސާފު ކަމަށެވެ.
އުޝާމް މިހެން ވިދާޅުވި އިރު، ރައީސް ޔާމީންގެ ކެމްޕެއިންގައި ޝުޖާއު އުސްމާނު އުޅުނުކަމުގެ ހެކި ޖޭއެސްސީގައި ހުރި ކަމަށް، މަޖިލީހުން މި މަހުގެ ކުރީކޮޅު އާއްމު ކުރި ރިޕޯޓަކުން ހާމަވިއެވެ. އެ ރިޕޯޓުގެ އަލީގައި ކްރިމިނަލް ކޯޓުގެ ގާޒީ ހަސަން ނަޖީބު މަގާމުން ވަކިކުރަން ޖޭއެސްސީން ނިންމި އިރު، ހަމަ އެ ރިޕޯޓުގައި ޝުޖާއު އުސްމާނާ ގުޅޭ ގޮތުން ފާހަގަކޮށްފައިވާ އެއްވެސް ކަމަކަށް މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ.
ޝުޖާއު އުސްމާނާ ގުޅޭ ސުލޫކީ އެތައް މައްސަލައެއް ޖޭއެސްސީން ބަލަމުން އަންނަތާ އަހަރެއް ވެއްޖެއެވެ. ބައެއް ފަނޑިޔާރުންގެ މައްސަލަ ހުށަހެޅުމާއި އެކު ތަހުގީގު ފެށި، ވަގުތުން ސަސްޕެންޑް ކުރެއެވެ. އެހެންނަމަވެސް ޝުޖާއު އުސްމާނުގެ އެތައް މައްސަލައެއް ޖޭއެސްސީން ބަލަމުން އަންނަ އިރުވެސް މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ.
