އިމެޖެންސީ ގައި މިހާރު ފަރުވާދެމުންދާ ކަމަށް މައުލޫމާތު ލިބިފައިވާ މި މީހާއަކީ އަހުމަދިއްޔާ ސްކޫލުގައި އަރަބި ބަސް ކިޔަވައިދޭ ޓީޗަރެއްގެ ގޮތުގައި ކުރިން އުޅުނު ޔާސިރު ޔަހުޔާ ސޯލިހުއެވެ. އެހެންމަވެސް މިކަމާއި ގުޅޭ އިތުރު ތަފްސީލެއް އަދި ނުލިބެއެެވެ.
2017 ވަނަ އަހަރު ހައްޔަރު ކޮށްފައިވާ ޔާސިރުގެ މައްސަލައިގައި އިމްރާން އަބްދުﷲ މިދިޔަ އަހަރު ވިދާޅުވެފައިވަނީ އޭނާގެ މައްސަލާގައި ސީރިއަސް ކަންތައްތަކެއް އެބަހުރިކަމަށެވެ. އަދި އެމައުލޫމާތު ފަހުން ދެއްވާނެ ކަމަށް މިނިސްޓަރ އިމްރާން ވިދާޅުވިނަމަވެސް މިއަދާހަމައަށްވެސް އެކަމުގެ މައުލޫމާތު ދެއްވާފައެއްނުވެއެވެ.
ޔާސިރުގެ މައްޗަށް ދައުވާއެއްވެސް ކޮށްފައި ނުވާއިރު އޭނާ ހައްޔަރު ކޮށްފައިވާތީ، ޔަހުޔާ ވަނީ މީގެ ކުރިން އެކި ފަހަރުމަތިން ބަޑުހައި ހޫނުކަމުގެ ހަޅުތާލުތައްވެސް ކޮށްފައެވެ. މީގެ ކުރިންވެސް ބަނޑުހައި ހޫނުކަމުގެ ހަޅުތާލުކޮށްގެން ޔާސިރުއަށް ވަނީ އިމަޖެންސީގައި ފަރުވާ ދީފައިވެއެވެ.
ޔާސިރު ޔަހުޔާ ސޯލިހު އަކީ ދިވެއްސަކާއި ކަވެނިކޮށްގެން އުޅޭ މީހަކަށްވާއިރު އެދެމަފިރިންގެ ކުއްޖަކުވެސް ހުރެއެވެ. އަދި ޔާސިރުގެ އަންހެނުންވަނީ އެކި ފަހަރު މަތިން ޔާސިރަށް އިންސާފް ލިބޭތޯ އެތަށް މަސައްކަތް ތަކެއް ކޮށްފައެވެ. ނަމަވެސް އަދި މިހާތަނަށް ޔާސިރަށް އިންސާފް ލިބިފައެއް ނުވެއެވެ.
ކުރީގެ ރައީސް ޔާމީންގެ ވެރިކަމުގައި ޔާސިރު ހައްޔަރުކޮށްފައިވަނީ ޓެރަރިޒަމާ ގުޅުންހުރި ތުހުމަތުތަކެއްގައެވެ.
