މާލެ ސަރަހައްދު ފުލް ލޮކްޑައުނެއްގައި އޮތްއިރު އާންމުންގެ ފަރާތުން ފެނިގެންދިޔަ ކިޔަމަންތެރިކަމާއެކު ބަލި ޖެހޭ މީހުންގެ ނިސްބަތް ބޮޑު ތަނުން ދަށްވި އެވެ. އެއާއެކު ފިޔަވަހިތަކަކަށް ބަހާލައިގެން ލުއިތައް ދެމުން އައިސް މިއަދު މިދަނީ ތިން ވަނަ ފިޔަވަހީގެ ލުއިތައް ގުނަމުންނެވެ. އޮފީސްތަކާއި ކެފޭ ރެސްޓޯރަންޓުތަކާއި ޖިމް އަދި ސެލޫންތަކުގެ އިތުރުން ސްކޫލުތައް ވެސް މިމަހުގެ އެއް ވަނަ ދުވަހު ހުޅުވާލާފައިވާއިރު ފެނިގެން މިދަނީ ކަންބޮޑުވުން އިތުރު މަންޒަރެކެވެ.
ބަލި ޖެހޭ މީހުންގެ ނިސްބަތް އިތުރުވެގެންދާއިރު އެކަމުގައި ކަންބޮޑުވުން އިތުރުވެގެންދަނީ ބަލި ޖެހޭ ދިވެހިންގެ ނިސްބަތް ވެސް އިތުރުވެގެންދާތީ އެވެ. ކުރިން ކޮންމެ ދުވަހަކު އެތައް ބަންގްލަދޭޝް މީހަކަށް ކޮވިޑް ޖެހެމުން އައި ނަމަވެސް އެމީހުންގެ ނިސްބަތް ދަށްވެ، ބަލި ޖެހުން އިތުރުވެފައި ވަނީ ދިވެހިންނަށެވެ. މިހާރު ބަލި ޖެހިފައިވާ ދިވެހިންގެ ނިސްބަތް ބަންގްލަދޭޝް މީހުންނާއި އަރާ ހަމަކުރަނީ އެވެ. ރާއްޖެއިން ކޮވިޑް ޖެހުނު 3044 މީހުންގެ ތެރޭގައި ބަންގްލަދޭޝްގެ 1,383 މީހަކު ހިމެނޭއިރު ދިވެހިންގެ އަދަދު އުޅެނީ 1,313 ގަ އެވެ.
ފާއިތުވި ދެތިން ހަފުތާގެ ތެރޭގައި، ބަލި ޖެހުނު މީހުންގެ 90 އިންސައްތައަށް ވުރެ ބޮޑު ބައި ހިއްސާކުރީ ދިވެހިން ކަމުން، ޑޮކްޓަރުން ވެސް ކަންބޮޑުވުން ފާޅުކޮށްފައިވެ އެވެ. ދިވެހިންނަށް ބަލި ޖެހުން އިތުރުވި ހިސާބުން ހޮސްޕިޓަލުގައި އެޑްމިޓް ކުރާ މީހުންގެ ނިސްބަތް އިތުރުވެގެންދިޔުމަކީ ބަލީގައި މީހުންގެ ފުރާނަ ގެއްލުމުގެ ފުރުސަތު އިތުރުވެގެންދާނެ ކަމެއްގެ ގޮތުގައި މީގެ ކުރިން ޓެކްނިކަލް އެޑްވައިޒަރީ ގްރޫޕް (ޓެގް) ގައި ހިމެނޭ ޑރ. އަލީ ލަތީފް ވިދާޅުވެފައިވެ އެވެ.
ޑރ. އަލީ ލަތީފް ވިދާޅުވާ ގޮތުގައި މީގެ ކުރިން ބަންގްލަދޭޝްގެ ރައްޔިތުންނަށް ބަލި ޖެހުން ނަމަވެސް ކަންބޮޑުވުން ފާޅުކޮށްފައި ނުވާ ސަބަބަކީ އެމީހުންގެ ތެރެއިން ގިނަ މީހުންނަކީ ޅަ އުމުރުގައި ވެސް ރަނގަޅު ސިއްހަތެއްގައި ތިބޭ ބަޔަކަށް ވުމެވެ. އެހެންނަމަވެސް ދިވެހިންގެ ތެރެއިން ގިނަ މީހުންނަކީ ޅަ އުމުރުގައި ވެސް ކޮންމެވެސް ކަހަލަ ބައްޔެއް ތަހައްމަލުކުރާ ބައެއް ކަމަށް ވިދާޅުވެފައިވެ އެވެ.
ބަލީގެ ނުރައްކާތެރިކަން އިތުރުވަމުން އަންނައިރު ވެސް މަގުމަތިން ފެންނަ މަންޒަރުތަކުން އިތުރަށް ކަންބޮޑުވާކަން ޑޮކްޓަރުން ފާހަގަކުރެ އެވެ. އެގޮތުން ބިރެއް ނެތި، ކުރިއެކޭ އެއްގޮތަށް މީހުން ބޭރުގައި އުޅެމުން އަންނަ ކަމަށާއި ބައެއް މީހުން އިޖުތިމާއީ ގައިދުރުކަމުގެ އިތުރުން މާސްކް ވެސް ނާޅާކަން ފާހަގަކޮށް ވަނީ ކަންބޮޑުވުން ފާޅުކޮށްފައެވެ. އަދި މިހާރު ފެންނަ ވަރަށް ކޭސްތައް ފެނިގެން ހިފަހައްޓާލެވުން ނަމަވެސް މިއަށް ވުރެ އިތުރުވެއްޖެނަމަ އަލުން އަނބުރާ ލޮކްޑައުންއަކަށް ދާންޖެހޭނެ ކަމުގެ އިންތިޒާރު ވެސް ޑޮކްޓަރުންދީފައިވެ އެވެ.