ހެލްތު މިނިސްޓްރީން ކާބޯތަކެތީގެ ހިދުމަތްދޭ ތަންތަނުގެ ހުއްދަ އާ ކުރަން މުއްދަތުދީފައި ވަނީ އަންނަ މަހުގެ 15 ވަނަ ދުވަހުގެ ނިޔަލަށެވެ.
ކާބޯތަކެތީގެ ހިދުމަތްދޭ ތަންތަނުގައި ހުންނަން ޖެހޭ ސާފުތާހިރުކަމުގެ މިންގަނޑު ބަޔާންކުރާ ގަވާއިދުގައިވާ ގޮތުން، ކާބޯތަކެތީގެ ހިދުމަތް ދޭ ފަރާތްތަކަށް ދޫކޮށްފައިވާ ހުއްދައިގެ މުއްދަތު ހަމަވުމުގެ އެއް މަސްކުރިން، ހުއްދަ އާކުރަން ޖެހެ އެވެ.
އެކަމަކު މާލެ ސަރަހައްދުގައި އިއުލާންކުރި ލޮކްޑައުން އާ ގުޅިގެން ސަރުކާރުގެ އޮފީސްތައް ބަންދުކުރުމުގެ ސަބަބުން ވަނީ މާޗު މަހުގެ 19 އިން ޖުލައި ފަހަކަށް އެ ހުއްދަ ހަމަވި ފަރާތްތަކަށް ހުއްދަ އާ ކުރެވިފައެއް ނުވެ އެވެ.
ކޮވިޑް-19 އާ ގުޅިގެން ކެފޭ/ ހޮޓާ އަދި ރެސްޓޯރަންޓުތައް ގިނަ ދުވަސްތަކެއް ވަންދެން ބަންދުކޮށްފައި ބެހެއްޓުމަށް ފަހު، އަލުން ހިދުމަތް ފަށާފައި ވަނީ މިމަހުގެ އެއް ވަނަ ދުވަހެވެ. އެގޮތުން ނިއު ނޯމަލްގައި ހިދުމަތް ދޭން ޖެހޭނެ ގޮތުގެ ގައިޑްލައިން އާންމުކޮށްފައިވާއިރު މާލޭ ސިޓީ ކައުންސިލުން އަންނަނީ އެގޮތަށް ހިދުމަތް ފޯރުކޮށްދެމުންދޭތޯ ކަށަވަރުކުރުމަށް ތަންތަން ބަލަމުންނެވެ.
