Advertisement

މިނިމަމް ވޭޖު ކަނޑައަޅާއިރު، ރިސޯޓް މުވައްޒަފުންނަށް ދިވާމެފައިވާ ސާވިސްޗާޖުގެ މައްސަލައަށް ހައްލުގެންނާނެ ކަމަށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ހއ. ބާރަށުގައި ވާހަކަ ދައްކަވަމުން ރައީސް ނަޝީދު ވިދާޅުވީ އެންމެ ކުޑަ އުޖޫރަ ކަނޑައެޅުމަކީ، މިއަހަރު ކުރަންހުރި މަސައްކަތްތަކުގެ ތެރެއިން އެންމެ ބޮޑު އެއް މަސައްކަތްކަމަށެވެ.

"ރާއްޖޭގައި މަސައްކަތްކުރާ ރައްޔިތުންގެ ތެރެއިން އެތައްބަޔަކަށް އެމީހުނަށް ހައްގުވާންޖެހޭ އެންމެ ކުޑަކުޑަ އުޖޫރަ، އެބަ ލިބެންޖެހޭ. ޤާނޫނީ ގޮތުން އެކަން މަޖުބޫރު ކުރުމަކީ އަޅުގަނޑުމެންގެ މައްސޫލިޔަތެއް. އަޅުގަނޑުމެންގެ ވާޖިބެއް." ރައީސް ނަޝީދު ވިދާޅުވި އެވެ.

ރިސޯޓްތަކުގައި މަސައްކަތްކުރާ މުވައްޒަފުންނަށް ސާވިސް ޗާޖު ދެމުންގެންދާ ވަރާއި މެދު ބައެއް ފަރާތްތަކުން ނުރުހުން ފާޅުކުރަމުން އަންނައިރު، ރައީސް ނަޝީދު ވަނީ ސާވިސްޗާޖުގެ މައްސަލައިގައި ވެސް ވާހަކަފުޅު ދައްކަވާފައެވެ.

އެގޮތުން ރައީސް ނަޝީދު ވިދާޅުވީ، ރިސޯޓް މުވައްޒަފުންނަށް ސާވިސް ޗާޖު ދިނުމުގައި ބައެއް ރިސޯޓްތައް ހިންގާ ފަރާތްތަކުން ބޭއިންސާފުން ކަންކުރަމުން އަންނަކަމަށެވެ. އަދި އެންމެ ކުޑައުޖޫރު ކަނޑައެޅުމުގެ މަސައްކަތުގެ ތެރޭގައި ސާވިސްޗާޖުގެ މައްސަލައިގައި މަސައްކަތްކުރެވޭނެ ކަމަށް ނަޝީދު ވިދާޅުވި އެވެ.