އުތުރު ކޮރެއާއިން އެ ބަލީގެ އަލާމާތް ހުރި މީހަކު ފެނުމާއެކު އެ ގައުމުގެ ކައެސޮންގް ސިޓީ ވަނީ ލޮކްޑައުނަކަށް ގޮސްފަ އެވެ.
ބައިނަލްއަގްވާމީ މީޑިއާތަކުން ރިޕޯޓުކުރާ ގޮތުގައި ދެކުނު ކޮރެއާއިން އެނބުރި އުތުރު ކޮރެއާއަށް އައި މީހެއްގެ ގައިން ވަނީ ކޮވިޑް-19 ގެ އަލާމާތްތައް ފެނިފަ އެވެ.
އުތުރު ކޮރެއާގައި މީގެ ކުރިން އެއްވެސް މީހަކަށް ކޮވިޑް ޖެހިފައި ނުވާ ކަމަށް އެ ގައުމުން ބުނިނަމަވެސް އެއީ ގަބޫލުކުރަން ދަތި ކަމެއް ކަމަށް އެނަލިސްޓުން ބުނެ އެވެ. އަދި ކޮވިޑަށް ޝައްކުކުރެވޭ އެ ކޭސް ފެނުމާއެކު ބަލި ފެތުރިގެން ހިނގައިދާނެތީ އިއްޔެ ބޭއްވި ބައްދަލުވުމުގައި ކޮރެއާގެ ލީޑަރު ކިމް ޖޮންގް-އުން ވަނީ ކުއްލި ނުރައްކަލުގެ ހާލަތު އިއުލާން ކޮށްފަ އެވެ.
ކޮވިޑަށް ޝައްކުކުރެވޭ އެ މީހާ ދެކުނު ކޮރެއާއަށް ގޮސްފައި ވަނީ ހުރަސްކުރުން މަނާކޮށްފައި އޮތް ބޯޑަރެއް ހުރަސްކޮށްގެންކަމުން، ކިމް ވަނީ ކަންބޮޑުވުން ފާޅުކޮށްފަ އެވެ. އަދި އެ ކަމާމެދު ނުރުހުން ފާޅުކުރައްވާ، ކިމް ވިދާޅުވީ އެކަމުގައި ޒިންމާވާ ފަރާތްތަކަށް އަދަބު ލިބޭނެ ކަމަށެވެ.
މީގެ ހަމަސް ކުރިން ކޮވިޑް-19 ހަލުވިކަމާއެކު ފެތުރެމުން ދިޔަ އިރު އުތުރު ކޮރެއާގެ ބޯޑަރުތައް ބަންދުކުރެވި، އެތައް ހާސް ބަޔަކު ވަނީ އައިސޮލޭޝަނަށް ގޮސްފަ އެވެ.
މި މަހުގެ ކުރީކޮޅު އުތުރު ކޮރެއާގައި ވަނީ ކޮވިޑާއި ދެކޮޅަށް މަސައްކަތްކުރުމުގައި އެ ގައުމުގެ "ވިދާލާ ކުރިއެރުން" ފާހަގަކޮށްފަ އެވެ.
