ކޮވިޑް-19 އާއި ގުޅިގެން ރާއްޖޭގެ ބޯޑަރުތައް ބަންދުކުރުމަށްފަހު މިމަހުގެ 15 ގައި އަލުން ހުޅުވިގެން ދިޔައިރު ގިނަ ގައުމުތަކުގެ ފްލައިތްތައް ވަނީ ރާއްޖެއާއި ދެމެދު އޮންނަ ދަތުރުތައް ފަށާފަ އެވެ. އެގޮތުން މިމަހުގެ 16 ވަނަ ދުވަހުން ފެށިގެން އެމިރޭޓްސްގެ ދަތުރުތައް ރާއްޖެއާއި ދުބާއީއާ ދެމެދު މިހާރު ވަނީ ފަށާފަ އެވެ.
އެމިރޭޓްސްއިން މިހާރު ހަފްތާ އަކު ފަސް ދުވަހު ދުބާއީއާއި މާލެއާ ދެމެދު ފްލައިޓުތައް ބާއްވަ އެވެ. އެހެންނަމަވެސް އަންނަ މަހުގެ ހަތަރަކުން ފެށިގެން އެމިރޭޓްސްއިން ރާއްޖެއަށް ހަފްތާއަކު ހަ ފްލައިޓު ބާއްވާނެ ކަމަށް އެ އެއާލައިނުން ވަނީ ބުނެފަ އެވެ.
އަންނަ މަހުގެ އެއްވަނަ ދުވަހުން ފެށިގެން ރާއްޖޭގެ އިތުރުން ސީޝެލްސް އާއި ދެމެދުގެ ދަތުރުތައްވެސް އެމިރޭޓްސްއިން ފަށާނެއެވެ.
އެމިރޭޓްސް އިން މެދުއިރުމައްޗާއި ޔޫރަޕުން ރާއްޖެއަށް ގިނަ އަދަދެއްގެ ފަތުރުވެރިން އުފުލާއިރު އެމިރޭޓްސް ހޮލިޑޭސް އިން ވަނީ ރާއްޖެއާއި ސީޝެލްސްގެ ރިސޯޓުތައް ހިމެނޭހެން ރިސޯޓު ހޮލިޑޭ ޕެކޭޖުތަކެއް ޔޫއޭއީގެ ފަތުރުވެރިންނަށް ހާއްސަކޮށް ތައާރަފުކޮށްފަ އެވެ.
އެމިރޭޓްސްގެ މިޕެކޭޖާއި އެކު ރާއްޖޭގެ ފަތުރުވެރިކަން ވަރަށް ބޮޑަށް އިޝްތިހާރުވެގެން ދާނެއެވެ.
އެމިރޭޓްސްއިން މިހާރު ވަނީ ލަންޑަން، ހީތްރޯ، ފްރޭންކްފާޓް، ޕެރިސް، މިލާން، މެޑްރިޑް، ޗިކާގޯ، ޓޮރޮންޓޯ، ސިޑްނީ، މެލްބޯން، މަނީލާ، ކާބުލް، ބަހްރައިން، މެންޗިސްޓާ އަދި ޒުރިޗް އަށް ދަތުރުތައް ފަށާފަ އެވެ.
