ގޫގުލް އިން ބުނީ ކޮވިޑް-19 އާއި އެކު ގޭގައި މަސައްކަތް ކުރަން ފަށާފައި ވާއިރު، އެ ކުންފުނީގެ ދެ ލައްކައެއްހާ މުވައްޒަފުން ކުރިއަށް އޮތް އަހަރު ދުވަހުވެސް ގޭގައި މަސައްކަތް ކުރަމުން ގެންދާ ގޮތަށް ނިންމާފައި ވާކަމަށެވެ.
ގޫގުލްގެ ދަށުން ހިންގާ އެހެން ކުންފުނިތަކުން ވެސް މިގޮތަށް އަމަލު ކުރަން ނިންމާފައި ވާއިރު، މީގެ ކުރިން ގޫގުލް އިން ނިންމާފައި ވަނީ އެ ކުންފުނީގެ މުވައްޒަފުން މި އަހަރު ނިމެންދެން ގޭގައި މަސައްކަތް ކުރުމަށެވެ.
އެ ކުންފުނީގެ ސީއީއޯ ވަނީ މި ބަދަލާއި އެކު ތަފާތު ގިނަ ބަހުސްތައް ކުރެވޭނެ ކަން އެނގޭ ކަމަށާއި އެހެން ނަމަވެސް އޭނާއަށް މުހިންމީ މުވައްޒަފުންގެ ރައްކާތެރިކަން ކަށަވަރު ކުރުން ކަމަށެވެ. އަދި މި ކަމުގެ ސަބަބުން މަސައްކަތައް ލުއި ލިބި މުވައްޒަފުންނާއި މުވައްޒުފަގުންގެ އާއިލާގެ ރައްކާތެރިކަން ކަށަވަރު ކުރެވިގެންދާނެ ކަމަށް އުންމީދު ކުރައްވާ ކަމަށް ސީއީއޯ ވަނީ ވިދާޅުވެފަ އެވެ.
ގޫގުލް އިން މިގޮތަށް ގޭގައި ތިބެގެން އެކުންފުނީގެ މުވައްޒަފުން މަސައްކަތްކުރާ ގޮތަށް ނިންމުމުން، މީގެ އަސަރު އެހެން ކުންފުނި ތަކަށް ވެސް ކުރާނެ ކަަމަށް ކަމާ ބެހޭ މާހިރުން ލަފާ ކުރެ އެވެ. އެގޮތުން، މިގޮތަށް މިސާލު ނަގައި އެހެން ކުންފުނިތަކުގެ މުވައްޒަފުންވެސް ގޭގައި ތިބެގެން މަސައްކަތްކުރާ ގޮތަށް ނިންމައިފާނެ ކަމަށް މާހިރުން ދެކެ އެވެ.
