ވިލާއެއާގެ ފްލައިމީގައި މަސައްކަތް ކުރާ ދިވެހި ޒުވާން ޕައިލެޓެއް ކަމުގައިވާ ސ. ހިތަދޫ، ކޯޒްވޭ ވިލާ، ސަނޫން ނަސީރު ރޭގެ ވަގުތެއްގައި ކުއްލި ގޮތަކަށް މަރުވެފައި އޮއްވާ ފުލުހުންނަށް ފެނުނީ އޭނާ ދިރިއުޅޭ ފްލެޓް ކައިރިއަށް ވެއްޓިފައި ވަނިކޮށެވެ.
ފުލުހުން ބުނީ ހުޅުމާލޭގެ ފްލެޓެއްގެ ކައިރި އަށް މީހަކު ހޭނެތިގެން ވެއްޓިފައިވާ ކަމުގެ މައުލޫމާތު އެއިދާރާއަށް ލިބުނީ ރޭ ދަންވަރު 3:30 ހާއިރު ކަމަށެވެ. އަދި އޭނާ ހުޅުމާލޭ ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ފުލުހުން ބުނި އެވެ.
ސީއެންއެމްއަށް އެނގިފައިވާ ގޮތުގައި ސަނޫންގެ ހަށިގަނޑު އަދިވެސް އޮތީ ހުޅުމާލޭ ހޮސްޕިޓަލްގައި ކަމަށެވެ. އަދި އޭނާ ކޮވިިޑް-19 އަށް ޓެސްޓު ކުރުމުގެ މަސައްކަތް މިހާރު ކުރަމުން ދާކަމަށާއި ނަތީޖާ އަދި ލިބިފައި ނުވާ ކަން ފާހަގަކުރި އެވެ.
ސަނޫންގެ އިތުރުން އޭނާގެ އެއްބަނޑު އެއްބަފާ ބޭބެވެސް މަސައްކަތް ކުރަމުންދަނީ ޕައިލެޓެއްގެ ގޮތުގައެވެ. އޭނާ ދިރިއުޅެމުން ދަނީ އޭނާގެ އާއިލާއާއެކު އެވެ. އަނތްބަކާއި ކުޑަ ދަރިއަކު އޭނާގެ ހުރެއެވެ.
ސަނޫން، ފްލައިމީގައި މަސައްކަތް ކުރަން ފެށީ އޮކްޓޫބަރު 2013 ގަ އެވެ. ފްލައިމީން ބުނީ ސަނޫނަކީ އަހުލާގު ރަނގަޅު، މަސައްކަތައް ފަރުވާތެރި މުވައްޒަފެއް ކަމަށެވެ. އަދި އޭނާގެ ކުއްލި މަރާއި އެކު ފްލައިމީން ވަނީ ސަނޫންގެ އާއިލާއަށް ތައުޒިއްޔާ ފޮނުވާފަ އެވެ.
