އެ ހޮސްޕިޓަލުގެ މެނޭޖަރު އަހުމަދު ސައީދު ސީއެންއެމްއަށް ވިދާޅުވި ގޮތުގައި ހޯމް ކަރަންޓީނުގައި ތިބޭ މީހުންގެ ސާމްޕަލްތައް މީގެ ކުރިން ފޮނުވަމުން އައީ މާލެއަށް ނަމަވެސް މިހާރު ރަށުގައި ކޮވިޑަށް ޓެސްޓް ކުރަން ފެށުމާއެކު ލުއިތަކެއް ލިބޭނެ އެވެ.
އެގޮތުން މީގެ ކުރިން ނަތީޖާ ލިބެން ވެސް ދުވަސް ނަގާ ކަމަށާއި އެކަމަކު މިހާރު ރަށުން އަވަހަށް ނަތީޖާ ލިބޭނެ ކަމަށް ސައީދު ވިދާޅުވި އެވެ.
ސައީދު ވިދާޅުވި ގޮތުގައި ކޮންމެ އެއް ގަޑިއިރެއްގެ ތެރޭގައި ދެ ސާމްޕަލް ޓެސްޓް ކުރެވޭނެ އެވެ. އެހެންކަމުން 24 ގަޑިއިރުގެ ތެރޭގައި 48 ސާމްޕަލް ޓެސްޓް ކުރެވޭނެ ކަމަށް ވިދާޅުވި އެވެ.
ތިނަދޫގައި ކޮވިޑަށް ޓެސްޓް ކުރަން ފެށުމާއެކު އެއަތޮޅުގެ އެކި ރަށްތަކަށް ވެސް ބޮޑު ލުޔެއް ލިބޭނެކަން ސައީދު ފާހަގަކުރެއްވި އެވެ. ސައީދު ވިދާޅުވީ އެ އާއެކު ދެން އެ އަތޮޅުގެ އެކި ރަށްތަކުން ނަގާ ސާމްޕަލްތައް ވެސް ޓެސްޓްކުރާނީ އެރަށުން ކަމަށެވެ.
ރާއްޖޭގެ އެކި ސަރަހައްދުތަކުގައި ކޮވިޑަށް ޓެސްޓްކުރެވޭނެ އިންތިޒާމުތައް ސަރުކާރުން ހަމަޖައްސަމުން އަންނައިރު މިހާރު ވެސް އައްޑޫގައި ހުންނަ އިކުއިޓޯރިއަލް ހޮސްޕިޓަލާއި ހދ. ކުޅުދުއްފުށީ ރީޖަނަލް ހޮސްޕިޓަލުގެ އިތުރުން ރ. އުނގޫފާރު ރީޖަނަލް ހޮސްޕިޓަލުގައި ވެސް އަންނަނީ ކޮވިޑަށް ޓެސްޓްކުރަމުންނެވެ. އަދި އަތޮޅު ތެރޭގައި މެޑިކަލް ފެސިލިޓީތައް ވެސް ވަނީ ގާއިމުކޮށްފަ އެވެ.
