މިމަހުގެ އެއް ވަނަ ދުވަހުން ފެށިގެން މާލޭ ސަރަހައްދުގައި މާސްކް އަޅަން މަޖުބޫރުކޮށްފައިވާއިރު މާސްކް ނާޅާއި އުޅޭ މީހުން 1000 ރުފިޔާ އިން ދަނީ ޖޫރިމަނާކުރަމުންނެވެ.
މޭޔަރު ޝިފާ ކުރެއްވި ޓްވީޓެއްގައި ވިދާޅުވީ، މާސްކް ނާޅާއި އުޅޭނަމަ އަނބުރާ ފުލް ލޮކްޑައުންއަކަށް ދާން ޖެހިދާނެ ކަމަށެވެ. އެގޮތުން ކޮފީޝޮޕްތަކާއި ކަންކަން މަތީގައި މީހުން ބޮނޑިއަކަށް އެއްވެގެން ނުތިބުމަށް ވެސް ވަނީ އިލްތިމާސްކުރައްވާފަ އެވެ.
އާންމުކުރާ ތަފާސްހިސާބުތަކުން އެނގޭ ގޮތުގައި ކޮންމެ ދުވަހަކު ވެސް އެކި އަދަދުތަކުން މީހުން ޖޫރިމަނާ ކުރެ އެވެ. އެގޮތުން މާސްކް އެޅުން މަޖުބޫރުކުރިތާ ހަފުތާއެއްގެ ތެރޭގައި ވަނީ 278 މީހަކު ޖޫރިމަނާކޮށްފައި ކަމަށް ހެލްތު އިމަޖަންސީ އޮޕަރޭޝަން ސެންޓަރުން ބުނެ އެވެ.
މިދިޔަ އޭޕްރީލް މަހުގެ 15 ވަނަ ދުވަހު މާލޭ ސަރަހައްދު ފުލް ލޮކްޑައުންއަކަށް ދިޔައިރު މެއި މަހުގެ ފަހުކޮޅު ވަނީ ކޮވިޑްގެ ކޭސްތައް މަދުވެ ލޮކްޑައުންއަށް ލުއިދޭން ފަށާފަ އެވެ. އެގޮތުން ޖުލައި މަހުގެ އެއްވަނަ ދުވަހު ބޮޑު ލުޔެއްދިންއިރު އެއާއެކު ފެނިގެންދިޔައީ ކޮވިޑް ޖެހޭ މީހުންގެ އަދަދު އިތުރުވެގެންދިޔަ ތަނެވެ.
އެއާއެކު އެންމެ ފަހުން މިމަހުގެ ތެރޭގައި ފިޔަވަޅުތައް ވަރުގަދަ ކުރުމުގެ ގޮތުން މާސްކް އެޅުން މަޖުބޫރުކުރުމާއެކު ކޮންމެ ރެއެއްގެ 10:00 އިން ފަތިހު 5:00 އަށް އަންނަނީ ކާފިއު ވެސް ހިންގަމުންނެވެ.
