މިނިސްޓަރު ފައްޔާޒު އެގޮތަށް ވިދާޅުވެފައި ވަނީ ރޭ ރާއްޖެ ޓީވީގެ ޕްރޮގްރާމެއްގައި އިންޑިއާ އާއި ޗައިނާގެ ލޯނުތަކާއި ގުޅިގެން ކުރި ސުވާލަކަށް ޖަވާބު ދެއްވަމުންނެވެ. މިނިސްޓަރު ވިދާޅުވީ އިންޑިއާގެ ސެކިއުރިޓީއަށް ގެއްލުންވާނެ ފަދަ އެއްވެސް އަމަލެއް ރާއްޖޭގައި ހިންގައިގެން ނުވާނެ ކަމަށާއި އެއީ ގައުމުގެ ރައްކާތެރިކަމާއި މުޅި ރީޖަން އާއި އެކުވެރި ގައުމުތަކުގެ ރައްކާތެރިކަން ކަށަވަރުކުރުމަކީ ވެސް ކުރަން ޖެހޭނެ ކަމަކަށްވާތީ ކަމަށެވެ.
މިނިސްޓަރު ފައްޔާޒު ވިދާޅުވީ، ޗައިނާއާ އެއްވެސް މައްސަލައެއް ނެތް ކަމަށާއި އެކަމަކު އެގައުމުގެ ލޯނުތަކަށް ވުރެ އިންޑިއާގެ ލޯނުތަކުގެ އިންޓަރެސްޓް ކުޑަ ކަމަށެވެ.
އެގޮތުން އެލޯނުތައް ނަގަމުން އަންނަނީ ޗައިނާއިން ނެގި ލޯނުތަކަށްވުރެ ކުޑަ އިންޓަރެސްޓެއްގައިކަން ފާހަގަކުރައްވާ މިނިސްޓަރު ވިދާޅުވީ ޗައިނާ އިން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ނަގާފައިވާ ލޯނުތަކަކީ އިންޓަރެސްޓް ބޮޑު ލޯނުތަކެއް ކަމަށެވެ.
އޭގެ އިތުރުން ފައްޔާޒު ވިދާޅުވީ އޭރު ބްރިޖުގެ މަޝްރޫއު ހިންގުމަށް ވުރެ އަތޮޅު ތެރޭގައި ހިންގަން ޖެހޭ މާ މުހިއްމު މަޝްރޫއުތައް ހުރި ކަމަށާއި މިއަދުގެ ސަރުކާރުން ލޯނުތައް ނަގައިގެން ކުރަމުންދަނީ އެ މަސައްކަތްތައް ކަމަށެވެ.
ފައްޔާޒު ވިދާޅުވީ، ޗައިނާގެ ލޯނާއި ގުޅިގެން ސުވާލު އުފެދޭނީ ދުނިޔޭގެ އެކި ގައުމުތަކުގައި ކަން ހިނގަމުންދާ ގޮތުގެ ސަބަބުން ކަމަށެވެ. އެގޮތުން ލޯނު އަނބުރާ ނުދެއްދުމާއެކު ޗައިނާއަށް ވަކި ބައެއް މިލްކުކުރެވޭ މަންޒަރު ފެންނަމުން އަންނަ ކަމަށާއި އެކަމަކު މިއަދު ނަގަމުން އަންނަ ލޯނުތައް ނަގަމުންދަނީ އެގޮތަށް އެކަން ނުކުރެވޭނެ ގޮތަކަށް ކަމަށް ވެސް ވިދާޅުވި އެވެ.
މިނިސްޓަރު ވަނީ ޗައިނާއާއެކު ވެސް ގާތް ގުޅުމެއް އެބަ އޮތް ކަމަށާއި އެގައުމުގެ ވިޔަފާރިތަކަށް ވެސް ރާއްޖެއިން މަރުހަބާ ކިޔާނެ ކަމަށް ވިދާޅުވެފަ އެވެ.
