ޝުޖާއު މަގާމުން އިސްތިއުފާ ދެއްވާފައި މިވަނީ އޭނާ މަގާމުން ވަކިކުރަން ޖޭއެސްސީ އިން ނިންމާއި، އެ މައްސަލަ މަޖިލީހަށް ފޮނުވާފައިވަނިކޮށެވެ.
އެ މައްސަލަ މިއަދު ރައްޔިތުންގެ މަޖިލީހުގެ ޖުޑީޝަރީ ކޮމެޓީއަށް ފޮނުވާފައިވަނިކޮށް ޝުޖާއު މަގާމުން އިސްތިއުފާ ދެއްވާއި، ނެރުއްވި ބަޔާނުގައި ބުނީ 1996 ވަނަ އަހަރުން ފެށިގެން އޭނާ އައީ ތެދުވެރިކަމާއި އިހުލާސްތެރިކަމާއެކު ފަނޑިޔާރެއްގެ މަގާމު އަދާކުރައްވަމުން ކަމަށެވެ.
ޝުޖާއު ވިދާޅުވީ ދިގު މުއްދަތެއް ވަންދެން ދައުލަތަށް ހިދުމަތް ކުރެއްވި ނަމަވެސް ހިތާމައަކީ ޝަރުއީ ދާއިރާއިން ރިޓަޔާ ކުރުމުގެ ފުރުސަތު ވެސް އޭނާއަށް ދިނުމަކާއި ނުލާއި އެއްވެސް އަސާސެއް ނެތް ކަންތައްތަކެއްގެ މައްޗަށް ބިނާކޮށް ބަދަލުހިފުމާއި ޒާތީ ހަސަދަވެރިކަމާއި ވަކި ސިޔާސީ ފިކުރެއް ކުރިއެރުވުމަށްޓަކައި ޖޭއެސްސީން އަނިޔާވެރި ނިންމުމެއް ނިންމުމުން ކަމަށެވެ.
ހައިކޯޓުގެ އިސްފަނޑިޔާރު ޝުޖާއު މަގާމުން ވަކިކުރަން ރައްޔިތުންގެ މަޖިލީހަށް ހުށަހަޅަން ނިންމީ މިދިޔަ ހަފުތާގަ އެވެ. ޝުޖާއު މަގާމުން ވަކިކުރަން މި ނިންމީ އަހަރަކަށް ވުރެ ގިނަ ދުވަހަށް ދެމިގެން ދިޔަ ތަހުގީގަކަށް ފަހު އެވެ.
