ޔޫތް މިނިސްޓަރު ވިދާޅުވީ ޓްރެކްސަރަހައްދުގައި ހަދަން ފަށާފައިވާ އިމާރާތުގެ މަސައްކަތް ގިނަ ދުވަސްތަކެއްގެ މެދު ކެނޑުމަކަށް ފަހު އަނެއްކާވެސް އެ މަސައަކަތް ފަށާފައިވާކަމަށެވެ.
މާލޭގެ ފަތާ ޓްރެކް ސަރަހައްދުގައި ހަދަމުންދާ އިމާރާތުގެ މަސައްކަތް އޮތީ ކޮވިޑް-19 އާއި ގުޅިގެންނާއި އެތަނުގެ އީއައިއޭ ހެދުމަށް މެދުކަޑާލާފައެވެ. މިމަސައްކަތް މިހާރު ފަށައިގެން ކުރިއަށް ދާއިރު ނޮވެމްބަރު މަހަށް މި މަސައްކަތް ނިންމާލެވޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވަނީ މިމަސައްކަތަށް ރައީސް ސޯލިހު ފަރާތްޕުޅުންނާއި އެކްސްކޯއިން އަދި މޯލްޑިވްސް ސްވިމް އެސޯސިއޭޝަން އިން ދެއްވާ އެއްބާރުލުން ފާހަގަކޮށް ޝުކުރު އަދާކުރައްވާފައެވެ.
ޔޫތް މިނިސްޓްރީގެ ފަރާތުން ސީއެމްއަށް މައުލޫމާތު ދެއްވަމުން ބުނީ މި މަސައްކަތުގެ ތެރެއިން ސްވިމިން ޓްރެކް ސަރަހައްދުގައި ފާހާނާ ބަރިއަކާއި ފެންވެރޭނެ އިންތިޒާމުގެ އިތުރުން ޗޭންޖިން ރޫމަކާއިއެކު، އިޝީންދެވޭނެހެން ހިޔާކުރެވިފައިވާ ސިޑިބަރިއެއް ގާއިމްވެގެންދާނެކަމަށެވެ.
މާލޭ ފާތާ ޓްރެކް ސަރަހައްދުގައި ހަދާ އިމާރާތް --
މި މަސައްކަތަކީ މިދިޔަ އަހަރުގެ ޖޫން މަހުގެ 20 ވަނަ ދުވަހު ޔޫތް މިނިސްޓްރީން މާޒިޔާ ކޮންސްޓްރަކްޝަނާއި ހަވާލުކޮށްގެން ކުރަމުން އަންނަ މަސައްކަތެކެވެ. ނަމަވެސް ކޮވިޑް-19 އާއި އަދި އީއައިއޭގެ ސަބަބުން މަޑުޖެހުންތަކެއް މިމަސައްކަތައް އައިކަން ޔޫތު މިނިސްޓްރީން ފާހަގަކޮށްފައިވެއެވެ.
