އިންޝުއަރެންސް ކުރަން ޖެހޭ ގޮތަށް އެއްގަމު ދަތުރުފަތުރުގެ ގާނޫނުގެ 69 ވަނަ މާޢްދާ އުނިކުރަން ހުށަހެޅުއްވީ ނޮޅިވަރަމު ދާއިރާގެ މެމްބަރު މުހައްމަދު ނަޝީދު އަބްދުﷲ އެވެ.
އިސްލާހު ހުށަހަޅުއްވާ ސަބަބެއްގެ ގޮތުގައި މެމްބަރު ވިދާޅުވީ
އެއްގަމު އުޅަނގުތައް އިންޝުއަރެންސް ކުރަމުން ދިޔަނަމަވެސް ހިނގާފައިވާ އެކްސިޑެންޓްތަކަށް އިންޝުއަރެންސް ލިބެމުން ނުދާއިރު ދިވެހި ރައްޔިތުންގެ އަތުން އަހަރަކު އެތައް މިލިއަން ރުފިޔާއެއް އިންޝުއަރެންސް ކުންފުނިތަކަށް ނަގަމުންދާކަމަށެވެ.
އަދި މިކަމުގެ ސަބަބުން ދިވެހި ސަރުކާރަށްވެސް އަދި ދިވެހި ރައްޔިތަކަށްވެސް އެއްވެސް މަންފާއެއް ލިބެމުންނުދާ ކަމެއް ޤާނޫނަކުން ރައްޔިތުންގެ މައްޗަށް ލާޒިމުކުރެވިފައި އޮތުމަކީ ބަލައިގަންނަން ދަތި އަދި ރައްޔިތުންނަށް ގެއްލުން ލިބޭކަމެއް ކަމަށް މެމްބަރު ނަޝީދު ވިދާޅުވިއެވެ. އެހެންވީމާ އެއްގަމު ދަތުރުފަތުރުގެ ޤާނޫނުގެ 69 ވަނަ މާއްދާއަކީ މިހާރުން މިހާރަށްވެސް އުވާލަންޖެހޭ މާއްދާއެއްކަމަށް ގިނަ ބަޔަކު ދެކޭ ކަމަށްވެސް މެމްބަރު ވިދާޅުވިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މިބިލުގެ ފުރަތަމަ ކިޔުން އިއްވާފައެވެ.
އެއްގަމު އުޅަނދުތަކުގެ އިންޝުއަރެންސް ކޮސްފައިވީނަމަވެސް މުދަލައް ގެއްލުމެއް ލިބުމުން އިންޝުއަރެންސް ނުލިބޭ ކަމަށް ގިނަ މީހުން ބުނެއެވެ.
މީގެ އިތުރަށް މެމްބަރު ނަޝީދު ވަނީ އެއްގަމު ދަތުރުފަތުރުގެ ގަނޫނަށް އިތުރު އިސްލާހެއްވެސް ހުށަހަޅުއްވަފައެވެ. އެއީ އެއްގަމުގައި ދުއްވާ ހަތަރުފުރޮޅުލީ އުޅަނދު ގަރާޖުގައި ރަޖިސްޓްރީ ކުރަން ނުޖެހޭގޮތަށް އެއްގަމު ދަތުރުފަތުރުގެ ގާނޫނަށް ހުށަހެޅުއްވި އިސްލާހެވެ.
އެ އިސްލާހުގައި ބުނެފައިވަނީ ދިވެހިރާއްޖޭގައި އިންޖީނުލީ އެއްގަމު އުޅަނދު ރަޖިސްޓަރީ ކުރުމުގައި އަމިއްލަ ފަރާތެއްގެ ގަރާޖެއްގައި ނުވަތަ އަމިއްލަ ފަރާތެއްގެ އެނޫންވެސް ތަނެއް ނުވަތަ ބިމެއްގައި އެ އުޅަނދު ބޭއްވުން ލާޒިމުވެގެންނުވާ ކަމަށެވެ.
