އެންބީއޭއެމް އިން އާންމުކޮށްފައިވާ މައުލުމާތުތަކުން ދައްކާ ގޮތުން ޓޫރިޒަމް މިނިސްޓްރީ އިން ވަނީ ރާއްޖޭގައި އޮޕަރޭޓް ކުރާ ސަފާރީތަކުގެ ތެރެއިން 78 ސަފާރީ އަކަށް ފަތުރުވެރިންނަށް ހިދުމަތް ދިނުމުގެ ހުއްދަ ދީފަ އެވެ. 

އެގޮތުން މިނިސްޓްރީން މިހާރު ދީފައިވާ ހުއްދަ ތަކުގެ ދަށުން 40 އަށް ވުރެ ގިނަ ސަފާރީ އިން ފަތުރުވެރިންނަށް ހިދުމަތްދޭން ފަށާފައިވާ އިރު، މި މަހު ޖުމްލަ 64 ސަފާރީ އަކުން ފަތުރުވެރިންނަށް ހިދުމަތް ދިނުމަށް ނިންމާފައިވާ ކަމަށް އެންބީއޭއެމް އިން ބުނެ އެވެ. 

އަދި މިނިސްޓްރީން ހުއްދަ ދީފައިވާ ސަފާރީތަކުގެ ތެރެއިން ހަ ސަފާރީއަކުން ފަތުރުވެރިންނަށް ހިދުމަތްދޭން ފަށާނީ ސެޕްޓެމްބަރު މަހު ކަމަށް އެންބީއޭއެމް އިން ބުނެ އެވެ. 

ސަރުކާރުން ކަނޑައަޅާފައިވާ މިންގަނޑުތަކަށް ފެތޭ ސަފާރީތަކަށް ހުއްދަ ދޭއިރު، އެކަމަށް އެދި ޓޫރިޒަމް މިނިސްޓްރީއަށް ޑިކްލަރޭޝަން ފޯމް އެއް ހުށަހަޅަންޖެހެ އެވެ. އަދި ސަފާރީގެ އޮޕަރޭޓިން ލައިސަންސް އާއި، މީރާގެ ޓެކްސް ކްލިއަރެންސް ފޯމް ވެސް މިނިސްޓްރީ އަށް ހުށަހަޅަންޖެހެ އެވެ. އޭގެ އިތުރުން ސަފާރީން ސަލާމަތާއި ރައްކާތެރިކަމުގެ މިންގަނޑުތައް ގެންގުޅޭނެ ގޮތުގެ ޕްލޭންއެއް ވެސް މިނިސްޓްރީ އަށް ހުށަހަޅަންޖެހެ އެވެ.

ހުއްދަ ހޯދުމުގެ މަރުހަލާގައި ގިނަ ވަގުތު ހޭދަވާތީ ސަފާރީތަކުން ހިދުމަތްދޭން ތާވަލްކުރާ ތާރީހުގެ ކުރިން ހުއްދަ ހޯދުމަށް އެދި މިނިސްޓްރީ އަށް ހުށަހެޅުމަށް ބޯޓިން އެސޯސިއޭޝަނުން ސަފާރީތަކަށް ވަނީ އަންގާފަ އެވެ. އެގޮތުން މީރާއަށް ދައްކަންޖެހޭ އެއްވެސް ޓެކްސް އެއް ވާނަމަ ޓެކްސް ކްލިއަރެންސް ފޯމު ހޯދުމަށް ލަސްތަކާ ކުރިމަތިވުމަކީ އެކަށީގެންވާ ކަމެއްކަމަށް އެ އެސޯސިއޭޝަނުން ފާހަގަކުރެ އެވެ.  

އޭގެ އިިތުރުން ސަފާރީތަކުގައި ޗުއްޓީ ހޭދަ ކުރުމަށްފަހު ފުރާ ފަތުރުވެރިންގެ ޕީސީއާރު ޓެސްޓު ހެދުމަށް ހުޅުމާލޭގައި ހާއްސަ އިންތިޒާމުތަކެއް އެންބީއޭއެމް އިން ރާވާފައި ވާއިރު، އެ އެސޯސިއޭޝަނުން ވަނީ ސަފާރީތަކުން މީހުން ރަށްރަށަށް ނޭރުމަށް ވެސް އިލްތިމާސް ކޮށްފަ އެވެ.