Advertisement

މަރުތައް ބަލާ ރިޔާސީ ކޮމިޝަނުން ބެލި ބޮޑެތި މަރުތަކުގެ މައްސަލައިގެ ތުހުމަތު ކުރެވޭ މުހައްމަދު މަޒީދާއި ސާމިތު މުހައްމަދުގެ މައްޗަށް ދައުވާ ކުރުމަށް އެދި ޕްރޮސެކިއުޓަ ޖެނެރަލް (ޕީޖީ) އޮފީހަށް ފޮނުވައިފި އެވެ.

ޝައްކު ކުރެވޭ މަރުތަކާއި ގެއްލިފައިވާ މީހުންގެ މައްސަލަތައް ބަލާ ރިޔާސީ ކޮމިޝަނުން މިއަދު ބުނީ އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީ އާއި، ނޫސްވެރިޔާ ރިލްވާން އަބްދުﷲ އަދި ބްލޮގަރު ޔާމީނު ރަޝީދު މަރާލަން ރާވައި އެކަން ކުރުވި މޭސްތިރިން ކަމަށް ތުހުމަތު ކުރެވޭ "ހަރުކަށި ފިކުރުގެ" ދެ މީހުންގެ މައްޗަށް ދައުވާ ކުރުމަށް އެދި ޕީޖީ އަށް ފޮނުވާފައިވާ ކަމަށެވެ.

Dr.Afrasheem aa Rilwan Abdulla aa Yameen Rasheed maraalan raavai ekan kuruvi meysthirin kamah thuhumathukuevey harukashi fikuruge Mohamed Mazeed aai Saamith Mohamed ge mahchchah dhauvaakurumah kuran jehey kankan kohdhevvumah edhi PG ofeehah mi commission in massala fonuvaifi.

— Commission on Disappearances and Deaths (@DdcomMdv) December 3, 2019

ކޮމިޝަނުން ފާހަގަކުރި ހަރުކަށި ފިކުރުގެ ދެ މީހުންނަކީ މުހައްމަދު މަޒީދާއި ސާމިތު މުހައްމަދެވެ. ރިލްވާނާއި އަފްރާޝީމްގެ މަރުގެ ތަހުގީގު ރިޕޯޓުގައި ވެސް އެ ދެ މީހުންގެ ނަން ފާހަގަކޮށްފައި ވެއެވެ.

ރިޕޯޓުތަކުގައި ނަން އާއްމުކޮށްފައި ހުރި ނަމަވެސް، އެއްވެސް މީހަކު ހައްޔަރުކޮށް ފިޔަވަޅު އަޅާފައި ނުވާތީ ކޮމިޝަނަށް އެކި ފަރާތްތަކުގެ ފާޑުކިޔުން އަމާޒުވި އެވެ. އެއީ ފުރިހަމަ ނޫން ރިޕޯޓުތަކެއް ކަމަށް ބުނެ ވެސް، ބައެއް ފަރާތްތަކުން ދިޔައީ ފާޑުކިޔަމުންނެވެ.

އެކަމަކު ކޮމިޝަނުގެ ރައީސް ހުސްނުއް ސުއޫދު ކުރިން ވިދާޅުވެފައި ވަނީ މަރުތަކުގެ ފަހަތުގައި ވަނީ ކޮން ބައެއް ކަމާއި، އެ މަރުތައް ހިންގުމުގެ ބޭނުން ވެސް ރިޕޯޓުތަކުން ސާފު ވާނެ ކަމަށެވެ.

އޭގެ އިތުރުން އެއީ ހަރުކަށި ފިކުރުގެ ޖަމާއަތްތަކާއި، ޖިނާއީ ކުށް ކުރާ ގޭންގަކާ ގުޅިގެން ހިންގި މަރުތަކެއް ކަމާއި، އެ ފިކުރުތައް ހިންގުމުގައި ރާއްޖޭގައި އިސްކޮށް އުޅެނީ މަޒީދާއި ސާމިތު ކަމަށް ވެސް ރިޕޯޓުގައި ވެއެވެ.

އެ ދެ މީހުންގެ މައްޗަށް ދައުވާ ކުރުމަށް އެދި ޕީޖީއަށް ފޮނުވި ނަމަވެސް، ހޯމް މިނިސްޓަރު އިމްރާން އަބްދުﷲ ކުރިން ވިދާޅުވެފައި ވަނީ ރިޕޯޓުތަކުގެ މައްޗަށް ބިނާކޮށް އެއްވެސް މީހަކާ މެދު ފިޔަވަޅު އެޅޭނެ ޖާގައެއް ނެތް ކަމަށް މަރުތައް ބަލާ ކޮމިޝަނުން ބުނެފައިވާ ކަމަށެވެ.

އެކަމާ ގުޅިގެން ސުއޫދު ވިދާޅުވީ ކޮމިޝަނުގެ ރިޕޯޓު "ފުރިހަމަ ނޫން ކަމަށް ބުނާނެ ތަނެއް ނެތް" ކަމަށެވެ. ނަމަވެސް އޭރު ރިޕޯޓާ ގުޅިގެން ފިޔަވަޅެއް އަޅާފައި ނުވަނީ ކީއްވެ ކަމެއް ސުއޫދު ވިދާޅެއް ނުވެ އެވެ.