އިކޮނަމިކް މިނިސްޓްރީން މިއަދު ކުރި އިއުލާނެއްގައި ބުނީ އިންކަމް ސަޕޯޓް އެލަވަންސް ދިނުމުގެ އުސޫލުގެ ދަށުން ދެވަނަ ބުރުގައި އެލަވަންސް ދިނުމަށް ހަމަޖެހިފައިވަނީ 2020 ވަނަ އަހަރުގެ ޖުލައި މަހާއި، އޯގަސްޓް މަހާއި އަދި ސެޕްޓެމްބަރު މަހަށް ކަމަށެވެ.
އެ އެލަވަންސަށް ވީހާވެސް ގިނަ ފަރާތްތަކެއް އެދުމުގެ ފުރުސަތު އިތުރުކުރުމުގެ ގޮތުން، ކޮންމެ މަހެއްގެ މުއްދަތު އިތުރުކޮށްދީފައިވެ އެވެ. އެގޮތުން ޖުލައި މަހުގެ އެލަވަންސަށް އެދި ހުށަހަޅަން ޖެހޭ އެންމެ ފަހު ތާރީހަކީ 15 ސެޕްޓެމްބަރު އެވެ. އަދި އޮގަސްޓް މަހުގެ އެލަވަންސަށް އެދި ހުށަހަޅަން ޖެހޭ އެންމެ ފަހު ތާރީހަކީ 30 ސެޕްޓެމްބަރެވެ. މީގެ އިތުރުން ސެޕްޓެމްބަރު މަހުގެ އެލަވަންސަށް އެދި ހުށަހަޅަން ޖެހޭ އެންމެ ފަހު ތާރީހަކީ 30 އޮކްޓޯބަރު ކަމަށް ވެސް މިނިސްޓްރީން ބުނެ އެވެ.
އިކޮނަމިކް މިނިސްޓްރީން ބުނީ އެ އެލަވަންސްއަށް ހުށަހެޅުމަށް ދެވަނަ ބުރުގައި ހަމަޖެހިފައިވަނީ ހަމައެކަނި ޖޮބް ސެންޓަރު މެދުވެރިކޮށް އޮންލައިން ފޯމަކުން ކަމަށެވެ.
އޮންލައިންކޮށް ހުށަހެޅުމަށް ކުރިން އުޒުރުވެރިވެފައިވާ ފަރާތްތަކުން، އީފާސްގައި ރަޖިސްޓާ ވުމަށްފަހު، އޮންލައިން ފޯމް ފުރިހަމަކުރުމަށް ފަހު ހުށަހެޅުމަށް އިކޮނަމިކް މިނިސްޓްރީން އެދެ އެވެ. އީފާސްގައި ރަޖިސްޓާ ވުމާ އެޕްލިކޭޝަން ހުށަހެޅުމާ ބެހޭ ތަފްސީލް ޖޮބް ސެންޓަރުގައި ޝާއިއު ކުރެވިފައިވާނެ ކަމަށް އެ މިނިސްޓްރީން ބުނެއެވެ.
2019 ވަނަ އަހަރުގެ ޑިސެމްބަރު އެކަކުން ފެށިގެން މުސާރައަށް ނުރަނގަޅު އަސަރެއް ކޮށްފައިވާ ކޮންމެ މީހަކަށް ވެސް އެ އެލަވަންސަށް އެދި ހުށަހެޅޭނެ އެވެ. އެގޮތުން އިންކަމް ސަޕޯޓް އެލަވަންސްގެ ގޮތުގައި އަންނަނީ ޝަރުތު ހަމަވާ ކޮންމެ މީހަކަށް ވެސް 5000 ރުފިޔާ ދޫކުރަމުންނެވެ.
