މިއަދު ވަނީ ތިނަދޫ އިން ކޮވިޑް-19 އަށް ޕޮޒިޓިވްވި އުމުރުން 68 އަހަރުގެ މީހާ ވިލިނގިލީ ކޮވިޑް ފެސިލިޓީއަށް ގެންދިއުމުން އެރަށަށް ނާރުވާ އަނބުރާ ފޮނުވާލާފަ އެވެ.
އެ މައްސަލައާ ގުޅިގެން ރައްޔިތުންގެ މަޖިލީހުގެ ގޯތި ތެރޭގައި ސައުދުއާއެކު ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް އާއި މަޑަވެލި ދާއިރާގެ މެމްބަރު ހުސައިން ފިރުޝާންގެ މެދުގައި ނުތަނަވަސްކަމެއް އުފެދިގެން އުޅޭ ވީޑިއޯއެއް މިހާރު ސޯޝަލް މީޑިއާގައި ދަނީ ދައުރުވަމުންނެވެ.
މެމްބަރު ސައުދު ދެއްކެވި ވާހަކަތަކަކާއި މެދު ހިތްހަމަނުޖެހިވަޑައިގެން މެމްބަރު ސަނީފް އާއި ފިރުޝާން ވަނީ ވާހަކަ ދައްކަވާފަ އެވެ.
އެގޮތުން މެމްބަރު ފިރުޝާން ވަނީ ފުވައްމުލަކު ނުވަތަ ތުރާކުން އައިކަމުގަައި ވިޔަސް ވިލިނގިލީ ފަޅައަށް ބަލި މީހަކު ގޮވައިގެން އައިސްފިނަމަ އަރުވަން ޖެހޭނެ ކަމަށެވެ. އަދި ރަށަށް ނާރުވާ އެއްވެސް ހުއްޖަތެއް ނުދެއްކޭނެ ކަމަށް ވިދާޅުވި އެވެ.
އޭގެ އިތުރުން ބަޔަކު މުޒާހަރާ ކުރަންޏާއި އެބަޔަކު ހައްޔަރުކުރުމަށް ފަހު ވެސް އަރުވަން ޖެހޭނެ ކަމަށް ވިދާޅުވެ އެވެ.
އެކަމާއި ގުޅިގެން ރައްދުގައި ސައުދު ވަނީ ތިނަދޫ އިން ކޮވިޑް ޖެހިފައިވާ މީހަކު ބޭރުކުރެވިގެން ވެސް ނުވާނެ ކަމަށް ވިދާޅުވެފަ އެވެ.
އެހެން ވިދާޅުވުމާއެކު މެމްބަރު ސަނީފް ވަނީ ކޮވިޑް ފެސިލިޓީ ހުރީ ވިލިނގިލީގައި ކަމަށް ވިދާޅުވެފަ އެވެ. އަދި އެތަނަކީ ވަގަށް ނެގި އެއްޗެއް ކަމަށް ވިދާޅުވެ އެވެ.
ކޮވިޑް ޕޭޝަންޓަކު ރަށަށް ނާރުވާ ނުހިފޭއްޓޭނެ ކަމަށާއި އެތަނަކީ ވިލިނގިލީ ތަނެއް ނޫން ކަމަށާއި އެއީ އަތޮޅުގެ ރައްޔިތުންގެ ތަނެއް ކަމަށް ސަނީފް ވިދާޅުވެ އެވެ.
