Advertisement

ދައުލަތުން މަޖިލީހަށް ހުށަހަޅާ ބަޖެޓްގެ ޖުމުލަ އަަދަދަށް ބަދަލު އައިސްގެން ނުވާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު މިހެން ވިދާޅުވީ އަންނަ އަހަރުގެ ބަޖެޓް، ބަޖެޓް ކޮމިޓީން ފާސްކުރިއިރު ބަޖެޓްގެ ޖުމްލަ އަދަދަށް ބަދަލު ގެނެސްފައިވާތީ ބަޖެޓް ކޮމިޓީގެ ރިޕޯޓް މަޖިލީހުގެ މިއަދުގެ ޖަލްސާއަށް ހުށަހެޅުމަށް ފުރުސަތު ދިނުމުގެ ކުރިން ދެއްކެވި ވާހަކަފުޅުގަ އެވެ.

ރައީސް ނަޝީދު ވިދާޅުވީ ސަރުކާރުގެ މެޖޯރިޓީ އޮތް މަޖިލީހަކަށް ހުށަހެޅޭ ބަޖެޓުގެ ޖުމުލަ އަދަދަށް ބަދަލު އައިސްގެން ނުވާނެ ކަމަށެވެ. އަދި ބަޖެޓްގެ ޑެފިސިޓް 5.8 އިންސައްތައިން 6.4 އިންސައްތަ އަށް އިތުރު ވެގެން ދިއުމަކީ ބޮޑު ބަދަލެއް ކަންވެސް އެމަނިކުފާނު ވަނީ ފާހަގަކުރައްވާފަ އެވެ.

"ހަގީގަތުގައި ބަޖެޓްގެ ޖުމުލަ އަަދަދަށް ބަދަލު އައިސްގެން ނުވާނެ. ހާއްސަ ގޮތެއްގައި ބަޖެޓް މި ހުށަހަޅަނީ މި މަޖިލީހުގެ މެޖޯރިޓީ ޕާޓީގެ ފަރާތުން." ރައީސް ނަޝީދު ވިދާޅުވި އެވެ.

މަޖިލީހުގެ ރައީސް ވިދާޅުވީ ބަޖެޓް ދިރާސާ ކުރި ކޮމިޓީން ބަޖެޓްގެ ޚަރަދަށް ބަދަލު ގެނެސްފައިވާއިރު އަންދާޒާ ކުރާ އާމްދަނީއަށް ބަދަލެއް ގެނެސްފައި ނުވާ ކަމަށެވެ.

ބަޖެޓް ދިރާސާ ކުރާ ކޮމިޓީން ވަނީ 2020 ވަނަ އަހަރަށް ލަފާކުރާ ދައުލަތުގެ ބަޖެޓަށް 273 މިލިއަން ރުފިޔާ ޕީއެސްއައިޕީ އަށް އިތުރު ކޮށްފަ އެވެ. އަދި ރިކަރެންޓް ހަރަދަށް 93 މިލިއަން އިތުރު ކޮށްފަ އެވެ. 2020 ވަނަ އަހަރަށް ލަފާކުރާ ބަޖެޓްގެ ގޮތުގައި ދައުލަތުން މަޖިލީހަށް ހުށަހަޅާފައިވަނީ 37.5 ބިލިއަން ރުފިޔާގެ ބަޖެޓެކެވެ. އެހެން ނަމަވެސް ބެޖެޓް ކޮމިޓީން ބަޖެޓް ފާސްކޮށްފައިވަނީ، 37.8 ބިލިއަން ރުފިޔާއަސް ބަޖެޓް ބޮޑު ކޮށްފަ އެވެ.