ވަހީދު ކުރެއްވި ޓްވީޓެއްގައި ވިދާޅުވެފައިވަނީ، އެމްޑީޕީ މެމްބަރުންނަކީ އަމިއްލަ މާއްދީ މަންފާގެ ބަދަލުގައި، މުޅި ޤައުމަށް ބަދަލުގެނައުމަށް އަމިއްލަ ޖާނާ މާލުން ހޭދަކޮށްގެން މަސައްކަތް ކުރަމުން އައި ބައެއް ކަމަށެވެ.
އަދި އެމްޑީޕީ ތެރޭގައި ތަފާތުކޮށް ޕާޓީތެރޭގައި މާއްދީ ދަހިވެތިކަމުގެ އާދައެއް އުފަންކުރުމަކީ އެހެން ޕާޓީތަކަށް ވީގޮތް އެމްޑީޕީއަށް މެދުވެރިވެދާނޭ ކަމެއްކަމަށް ވަހީދު ވިދާޅުވި އެވެ.
ވަހީދު މިފަދައިން ވިދާޅުވެފައިމިވަނީ އިކޮނޮމިކް މިނިސްޓަރު ފައްޔާޒް އިސްމާއީލް މަގާމުގެ މައްސޫލިޔަތުން އެކަހެރިވުމަށް އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު އެދިވަޑައިގެން ޕާޓިގެ ޗެއާޕާސަން ހަސަން ލަތީފަށް ސިޓީއެއް ފޮނުވާފައިވަނިކޮށެވެ.
ރައީސް ނަޝީދުގެ ސިޓީގައި ބުނެފައިވަނީ، ފައްޔާޒާއި އެހެން ބޭފުޅަކާ ވެސް ޒާތީ ކަމެއް ނެތް ކަމަށާއި، އެގޮތަށް ބޭނުންފުޅުވެވަޑައިގަންނަވަނީ އެމްޑީޕީއަށް ލިބިދާނެ ގެއްލުމަކަށްޓަކައި ކަމަށެވެ. އަދި ފައްޔާޒަށް ކުރެވޭ ކޮރަޕްޝަނުގެ ތުހުމަތުތައް ބަލަން ޖެހޭނެ ކަމަށް ވެސް ނަޝީދުގެ ސިޓީގައި ވެއެވެ.
ރައީސް ނަޝީދުގެ މި ސިޓީއާއި ގުޅިގެން މިނިސްޓަރު ފައްޔާޒް ވިދާޅުވެފައިވަނީ އަމިއްލަފުޅަށް މަގާމުން އިސްތިއުފާ ނުދެއްވާނެ ކަމަށެވެ. އަދި ކުރެވޭ ތުހުމަތުތަކަކީ ރަނގަޅު ވާހަކަތަކެއް ނޫންކަމަށް ވެސް ވިދާޅުވެފައިވެ އެވެ.
