ޔޫތް މިނިސްޓްރީން ކޮށްފައިވާ އިއުލާނެއްގައި ބުނީ ޕާފޯމިން އާޓްސްގެ ދާއިރާގައި ހަރަކާތްތެރިވާ ފަރާތްތަކަށް ފަރިތަކުރުންތައް ކުރިޔަށް ގެންދިޔުމުގައި ދަތިތަކެއް ހުރި ކަމުގެ ޝަކުވާ އެ މިނިސްޓްރީއަށް ލިބެމުން އަންނަ ކަމަށެވެ.
އެހެންވުމުން، އާޓްސްގެ ދާއިރާގައި ގިނައިން ހަރަކާތްތެރި ވަމުން އަންނަނީ ޒުވާނުން ކަމަށްވުމާއެކު އެ ފަރާތްތަކުގެ ކަންބޮޑުވުންތަކަށް ހައްލެއް ހޯދައިދިނުމަށް އެ މިނިސްޓްރީގެ ބެލުމުގެ ދަށުގައިވާ ހުޅުމާލޭ އިންޑޯ ކޮމްޕްލެކްސްގެ ހޯލް އެ މިނިސްޓްރީއިން ކަނޑައަޅާ އުސޫލެއްގެ ދަށުން އެ ފަރާތްތަކަށް ދޫކުރުމަށް ނިންމާފައިވާ ކަމަށެވެ.
ޔޫތް މިނިސްޓްރީން ބުނީ އެ އިންޑޯ ހޯލްގައި ފަރިތަކުރުންތައް ކުރިޔަށް ގެންދިޔުމަށް ބޭނުންވާ ފަރާތްތަކުން މިއަހަރުގެ ސެޕްޓެމްބަރު 30 ވަނަ ދުވަހުގެ 13:00 ގެ ކުރިން އެ މިނިސްޓްރީއަށް އީމެއިލް ނުވަތަ ސިޓީއަކުން އެކަން އެންގުން އެދޭކަމަށެވެ.
އަދި އެކަމާގުޅޭ އިތުރު މައުލޫމާތު ބޭނުންވާ ފަރާތްތަކުން އެމިނިސްޓްރީގެ ހޮޓްލައިން 7905784 އަށް ގުޅުމަށް މިނިސްޓްރީން އެދިފައިވެއެވެ.
