އެ ކޯޓުން ބުނީ ޖިނާއީ އަދުލުގެ ނިޒާމުގެ ތެރެއިން މައްސަލަތައް އަވަސް ކުރުމަށް ގިނަ މަސައްކަތްތަކެއް ކުރަމުންދާ ކަމަށާއި އެގޮތުން 2013 ގެ ކުރިން ހުށަހެޅި ހުރިހާ މައްސަލައެއް ނިންމާލާފައިވާ ކަމަށެވެ.
ކްރިމިނަލް ކޯޓުގައި މައްސަލަތައް ނުނިމި ދިގުލައިގެން ދާތީ ޖުޑީޝަލް ސާވިސް ކޮމިޝަން (ޖޭއެސްސީ) އިން ވަނީ އެކަން ދިރާސާކޮށް މިދިޔަ އަހަރުގެ ތެރޭގައި ރިޕޯޓެއް އެކުލަވާލާފަ އެވެ.
އެ ރިޕޯޓުގައި ލަފާ ދީފައި ވަނީ ގިނަ ދުވަސްވީ މައްސަލަތައް ބެލުމަށް ވަކި މުހުލަތެއް ދިނުމަށް ފަހު، އެގޮތަށް އަމަލު ނުކުރާ ގާޒީންގެ ސުލޫކީ މައްސަލަ ބެލުމަށެވެ.
ދިހަ އަހަރާއި ތިން އަހަރަށް ވުރެ ގިނަ ދުވަސް ވެފައިވާ މައްސަލަތައް ތާވަލްކޮށް، ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާ ގޮތަށް މުޅި މައްސަލައިގެ ތާވަލެއް، މައްސަލައިގައި ހިމެނޭ ފަރާތްތަކަށް ދިނުމަށް ފަހު 45 ދުވަސް ތެރޭ މައްސަލަ ނިމޭ ގޮތަށް ތާވަލް ކުރުމަށް އެ ރިޕޯޓުގައި ލަފާ ދީފައި ވެއެވެ.
އޭގެ އިތުރުން ފަސް އަހަރަށް ވުރެ ގިނަ ދުވަސް ވެފައިވާ މައްސަލަތައް 30 ދުވަހުގެ ތެރޭގައި ތާވަލުކޮށް މުޅި މައްސަލައިގެ ތާވަލެއް މައްސަލައިގައި ހިމެނޭ ފަރާތްތަކަށް ދިނުމަށް ވެސް ރިޕޯޓުގައި ލަފާ ދީފައި ވެއެވެ.
އެފަދަ ރިޕޯޓެއް ޖޭއެސްސީން އެކުލަވާލީ ކްރިމިނަލް ކޯޓުގައި މައްސަލަތައް ދިގުލައިގެންދާ ކަމުގެ ޝަކުވާތައް ލިބެން ފެށުމުންނެވެ.
