ޑިޕާޓްމެންޓް އޮފް ޕަބްލިކް އެގަަޒަމިނޭޝަން އިން ބުނީ ކޮވިޑް-19 އާ ގުޅިގެން އިމްތިހާނު ހަދާ ސެންޓަރު ހުރި ރަށް ނޫން އެހެން ރަށްރަށުގައި ތިބި ދަރިވަރުން، 2020 ވަނަ އަހަރުގެ އޮކްޓޫބަރު އަދި ނޮވެމްބަރު މަހުގައި ބޭއްވުމަށް ހަމަޖެހިފައިވާ "އައިއޭއެޓް އެޑެކްސެލް އޭލެވެލް އިމްތިހާނު" ހެދުމަށްޓަކައި، އެ ކެންޑިޑޭޓަކު އިމްތިހާނު ހަދާ ސެންޓަރު ހުރި ރަށަށް ދިއުމަށް އިލްތިމާސް ކުރާކަމަށެވެ.
އެގޮތުން މިވަގުތު އިމްތިހާން ހަދާ ދަރިވަރުންގެ ތެރެއިން ކޮވިޑް-19 ގެ ސަބަބުން ނުވަތަ އެހެންގޮތަކުންވެސް އިމްތިހާން ހަދާ ސެންޓަރު ހުރި ރަށް ނޫން އެހެން ރަށެއްގައި ހުރިނަމަ މި ހިނގާ ސެޕްޓެންބަރު 27 ވާ އާދީއްތަ ދުވަހުގެ ކުރިން އެ ސެންޓަރު ހުރި ރަށަަކަށް ދިއުމަށް އެ ޑިޕާޓްމެންޓްއިން އެދިފައިވެއެވެ.
އެޕްރީލް 15ގައި މާލެއިން ކޮވިޑް-19 އަށް ޕޮޒިޓިވް މީހަކު ފެނުނުކަން ހެލްތު ޕްރޮޓެކްޝަން އޭޖެންސީން އިއުލާންކުރުމާ އެކު ސްކޫލްތަކުގެ ކިޔެވުމަށްވެސް ވަނީ ވަރަށް ބޮޑަށް އަސަރުކޮށްފައެވެ. އެގޮތުން އޭގެ ފަހުންވެސް އެކި ފަހަރުމަތިން ކިޔެވުން ކުރިއަށް ގެންދެވެތޯ ސްކޫލްތައް ހުޅުވާލިނަމަވެސް ކޮވިޑްގެ ހާލަތު ގޯސްވާން ފެށުމުން އަނެއްކާވެސް ސްކޫލްތައް ބަންދުކޮށް ކިޔަވާދެމުންދަނީ އޮންލައިންކޮށެވެ. ސްކޫލްތައް ހުޅުވާލައިގެން ކިޔަވައި ދެވޭނެ ދުވަހެއް އަދި އެގިފައިނުވާއިރު އެންމެ ބޮޑަށް ކަންބޮޑުވުން އުފެދިފައިވަނީ އޭލެވެލް އަދި އޯލެވެލް މިއަަހަރު ހަދާ ދަރިވަރުންގެ އިމްތިހާނާއިމެދު އެވެ.
އޭ ލެވެލް ދަރިވަރުންގެ އިމްތިހާނަށް ތައްޔާރުވުމުގެ ގޮތުން މާލެ ސަރަހައްދުގެ ސްކޫލުތަކުގައި ކިޔަވައިދޭން މިދިޔަ އޮގަސްޓް މަހު ވަނީ ފަށާފައެވެ.
ސްކޫލުތަކުގައި ތައްޔާރުވަމުން ދަނީ ގްރޭޑް 11 ގެ އޭއެސް އިމްތިހާނާއި ގްރޭޑް 12 ގެ އޭ2 އިމްތިހާނަށެވެ.
އެ އިމްތިހާންތަކަށް ތައްޔާރުވުމަށް ސީއެޗްއެސްއީ، އަހްމަދިއްޔާ އަދި ވިލާ އިންޓަނޭޝަނަލް ހައި ސްކޫލުގައި ކިޔެވުން ފަށާފައިވެއެވެ.
އެޑިއުކޭޝަން މިނިސްޓްރީން ބުނެފައިވަނީ، ކޮވިޑް-19 އާ ގުޅިގެން ހެލްތް ޕްރޮޓެކްޝަން އެޖެންސީ (އެޗްޕީއޭ) އާއި ކަމާގުޅުންހުރި އިދާރާތަކުގެ ލަފާގެ މަތިން، މާލޭ ސިޓީގެ ސްކޫލްތަކުގައި 20 ސެޕްޓެމްބަރުން ފެށިގެން އެކެއް އޮކްޓޯބަރުގެ ނިޔަލަށް ކިޔަވައިދިނުން އޮންލައިންކޮށް ކުރިއަށް ގެންދިއުމަށް މިހާރުވަނީ އަނެއްކާވެސް ނިންމާފައިވާކަމަށެވެ. އަދި މި ނިންމުން ދެ ހަފްތާ ފަހުން މުރާޖައާ ކުރާނެ ކަމަށްވެސް އެޑިއުކޭޝަން މިނިސްޓްރީން މައުލޫމާތު ދީފައިވެ އެވެ.
ކޮވިޑް-19 އާ ގުޅިގެން މާލެ ސަރަހައްދުގެ ސްކޫލުތައް ބަންދުކުރުމަށް ފަހު އަލުން ކިޔަވައިދޭން ފެށީ ޖުލައި އެއްވަނަ ދުވަހުން ފެށިގެން ފެށިގެން ގްރޭޑް 9 އިން މަތީގެ ދަރިވަރުންނަށެވެ.
