ކޮވިޑް-19 ގެ ސަބަބުން ދިމާވެފައިވާ އިގްތިސޯދީ ދަތިތަކާ ގުޅިގެން އާއްމުންނަށް ލުޔެއް ހޯދައިދިނުމުގެ ގޮތުން ބޭންކުތަކުން ވަނީ މާޗް މަހުން ފެށިގެން ލޯނު އަނބުރާ ދެއްކުން ފަސްކޮށްދީފަ އެވެ.
އެގޮތުން އެސްޑީއެފްސީ އިން އެންމެ ފުރަތަމަ ދިން ހަ މަހުގެ މުއްދަތު ހަމަވުމުން މި އަހަރުގެ ނިޔަލަށް ލޯނުތައް ދެއްކުން ފަސްކޮށްދިނުމަށް އެދި ހުށަހެޅުމުގެ ފުރުސަތު އެ ބޭންކުން ހުޅުވާލި އެވެ.
މިދިޔަ ހުކުރު ދުވަހު އެ މުއްދަތު ހަމަވިއިރު، ގިނަ ބަޔަކަށް އެކަމަށް އެދި ހުށަހަޅަން ދަތިވެފައިވާ ކަމަށް އެސްޑީއެފްސީއިން މިއަދު ނެރުނު އިއުލާނެއްގައި ވެއެވެ.
އެހެންކަމުން އެ ބޭންކުން ވަނީ މޮރެޓޯރިއަމް އަށް އެދުމުގެ ފުރުސަތު އޮކްޓޯބަރު މަހުގެ 8 ވަނަ ދުވަހާ ހަމައަށް އިތުރުކޮށްފަ އެވެ.
އެސްޑީއެފްސީން ދޭ މޮރެޓޯރިއަމްގެ ތެރޭގައި ރިލީފް ސްކީމްގެ ދަށުން ނަގާ ލޯނު ނުހިމެނޭއިރު، މޮރެޓޯރިއަމްއަށް އެދެވޭނީ މާޗް މަހު ހުޅުވާލި ފުރުސަތުގައި ވެސް އެކަމަށް އެދުނު ފަރާތްތަކަށެވެ.
