ފިނޭންސް މިނިސްޓްރީން އެންމެ ފަހުން އާއްމު ކުރި ތަފާސްހިސާބުގައިވާ ގޮތުން އިންކަމް ސަޕޯޓް އެލަވަންސްގެ ގޮތުގައި ދޫކުރުމަށް ނިމުނު ހަފްތާގައި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އަށް 6.9 މިލިއަން ރުފިޔާ ކަނޑައެޅި އެވެ.
އެއާއެކު ކޮވިޑް-19 އާ ގުޅިގެން އިންކަމް ސަޕޯޓް އެލަވަންސްގެ ގޮތުގައި ދޫކުރި ޖުމްލަ އަދަދު ވަނީ 96.7 މިލިއަނަށް އަރާފަ އެވެ.
އޭގެ އިތުރުން ކޮވިޑް-19 ރިކަވަރީ ލޯން ސްކީމަށް 900 މިލިއަން ރުފިޔާ އަދި ކަރަންޓު ބިލުގެ ޑިސްކައުންޓުގެ ގޮތުގައި 17 މިލިއަން ރުފިޔާ މިހާތަނަށް ދޫކޮށްފައިވާ ކަމަށް ވެސް ތަފާސްހިސާބުން ދައްކަ އެވެ.
ތަފާސްހިސާބުން ދައްކާ ގޮތުގައި ސެޕްޓެމްބަރު 24 ގެ ނިޔަލަށް ކޮވިޑް-19 އިގްތިސޯދީ ރިލީފް ޕެކޭޖުތަކަށް 1.01 ބިލިއަން ރުފިޔާ ހޭދަކޮށްފައި ވެއެވެ. އެއީ އޭގެ ކުރީ ހަފްތާއާ އަޅާ ބަލާއިރު 0.7 ޕަސަންޓުގެ އިތުރުވުމެކެވެ.
