އެސްޖޭން މިއަދު ކުރި ޓްވީޓެއްގައި ވަނީ، އެ ސްކޫލް އަޅަން ނިންމާފައިވާ ބިން ސާފު ކޮށް ފައުންޑޭޝަން ރިންގް އަޅައި ކަވަރު ބްލޮކްތައް ވެސް މިހާރު އަޅާފައިވާ ކަމަށެވެ. މާލޭ ޖަލާއި، ވިލާ ކޮލެޖާ ދެމެދު އޮތް ބިމުގައި އިމާރާތް ކުރާ އާ ސުކޫލްގެ މަސައްކަތް، ސިޓީ ކައުންސިލުން އެ އިމާރާތުގެ ކުރެހުން އެޕްރޫވް ކުރާ ވަގުތުން ފެށިގެން ފުލް ގިއަރުގައި ކުރިއަށް ދާނެ ކަމަށް އެ ކުންފުނިން ބުނެ އެވެ.
އެ ކުންފުނީގެ ޑިރެކްޓަރު ޝިހާދު އިބްރާހިމް ކުރެއްވި ޓްވީޓެއްގައި ވަނީ ސަރުކާރުން ހާއްސަ އިސްކަމެއް ދެއްވައިގެން ހިންގާ މަޝްރޫއުތަކަށް އޮތް އެންމެ ބޮޑު ހުރަހަކީ ކައުންސިލްތައް ކަމަށެވެ. އެގޮތުން ދަރުމަވަންތަ ސްކޫލްގެ ކުރެހުން ފާސްނުވެ ސިޓީ ކައުންސިލްގައި އޮންނަތާ ދުވަސްތަކެއް ވެއްޖެ ކަމަށް ޝިހާދުގެ ޓްވީޓުގައި ވެސް ފާހަގަ ކޮށްފައި ވެއެވެ.
ނަމަވެސް އެ ކުރެހުން ފާސްކުރުން ލަސްވަނީ ކީއްވެގެން ކަމެއް ސާފެއް ނުވެ އެވެ. އެކަމާއި ގުޅޭ ގޮތުން ސިޓީ ކައުންސިލްގެ ބަހެއް ހޯދުމަށް މަސައްކަތް ކުރި ނަމަވެސް، މިހާތަނަށް އެއްވެސް ކޮމެންޓެއް ލިބިފައެއް ނުވެ އެވެ.
ނުވަ ކުންފުންޏަކުން ބިޑް ކުރި ޕްރޮޖެކްޓް އެސްޖޭ އަށް ދޭން ނިންމައި، އެ ކުންފުންޏާ އެކު އެޑިއުކޭޝަން މިނިސްޓްރީން އެއްބަސްވުމުގައި ސޮއި ކުރީ މިދިޔަ ފެބްރުއަރީ މަހުގެ ކުރީކޮޅެވެ. އެކަމަކު އެ ތަނުގައި އޮތް ފުޓްސެލް ދަނޑު ނެގުމާ މެދު ކަމާގުޅޭ އިދާރާތަކަށް ގޮތެއް ނިންމުން ލަސްވުމާއި ގުޅިގެން، އެކަން ފެށޭވަރު ވީ އޯގަސްޓް މެދެއްހާ ތަނުގަ އެވެ. އޭގެ އިތުރުން ކޮވިޑް-19 އާ ގުޅިގެން މާލެ ލޮކްޑައުން އަކަށް ދިއުމާއި ގުޅިގެން ވެސް އެކަމުގައި ދަތިތަކެއް ކުރިމަތިވި އެވެ.
އެޑިއުކޭޝަން މިނިސްޓްރީން ބުނެފައިވާ ގޮތުގައި އާ ސްކޫލުގެ މަސައްކަތް އެސްޖޭ ކޮންސްޓްރަކްޝަނާ ހަވާލުކުރީ 364 ދުވަހުގެ ތެރޭގައި ނިންމާ ގޮތަށެވެ. އަދި އެ ސްކޫލުވެގެންދާނީ ވަށާޖެހޭ ތައުލީމެއް ދެވޭ، އެއްދަންފަޅިއަށް ހިންގޭނެ ފުރަތަމަ މޮޑެލް ސްކޫލަށް ކަމަށް ވެސް މިނިސްޓްރީން ބުނެ އެވެ.
ދަރިވަރުން ގިނަވެ މަޖީދިއްޔާ ސްކޫލު ހިންގަން ދަތިތަކާ ކުރިމަތިވެގެން މީގެ 17 ވަރަކަށް އަހަރުކުރިން، ދަރުމަވަންތަ ސްކޫލުގެ ނަމުގައި ސްކޫލެއް އުފެއްދީ މަޖީދިއްޔާއާ އިންވެގެންނެވެ. ނަމަވެސް އެތަން ވަރަށް ބޮޑަށް ބާވެ ރެނދުލާފައިވާތީ 2016 ވަނަ އަހަރުގެ ތެރޭގައި ވަނީ އާ އިމާރާތެއް އެޅުމަށްޓަކައި އެތަން ބަންދުކޮށްފަ އެވެ. އަދި އެއަށް ފަހު އެތަން ވަގުތީ ގޮތުން ހިންގަމުން އަންނަނީ ވެލާނާގެ ކައިރީ އޮންނަ ހުސް ބިމުގައި ހަދާފައިވާ ވަގުތީ އިމާރާތެއްގަ އެވެ.
ދަރުމަވަންތަ ސްކޫލުގެ އާ އިމާރާތް ޑިޒައިން ކޮށްފައި ވަނީ 1000 ދަރިވަރުންނަށް ކިޔަވައިދެވޭ ގޮތަށެވެ. އެގޮތުން ހަ ބުރިއަށް އިމާރާތް ކުރާ އެ ސްކޫލުގައި 41 ކްލާސްރޫމް ހުންނާނެ އެވެ. ކޮންމެ ކްލާހެއްގައި ވެސް ގިނަވަގެން ކިޔަވައިދޭނީ 25 ދަރިވަރުންނަށެވެ.
މިނިސްޓްރީން ބުނާ ގޮތުގައި ދަރުމަވަންތަ ސްކޫލުގެ އާ އިމާރާތުގައި 2022 ވަނަ އަހަރުގެ ދިރާސީއާ އަހަރާއެކު ކިޔަވައިދޭން ފެށޭނެ އެވެ.
