ބީޓީއެސްއިން އެ މޫވްމަންޓަށް މިލިއަން ޑޮލަރު ހަދިޔާ ކުރުމާއެކު އެ ބޭންޑުގެ ފޭން "އާމީ" އިން ވެސް ވަނީ ހަމަ އެ އަދަދަށް ފައިސާ ހަދިޔާކޮށްފަ އެވެ.
ބީޓީއެސްގެ ޖިން، ސޫގާ، ޖޭ-ހޯޕް، އާރްއެމް، ޖިމިން، ވީ އަދި ޖުންގްކޫކް އާއި އެމީހުންގެ އޭޖެންސީ ބިގްހިޓް އެންޓަޓެއިންމަންޓުން އެ ފައިސާ ހަދިޔާ ކުރީ ޖޫން މަހު އެވެ.
އެ ދުވަސްވަރަކީ އެމެރިކާގައި ކަޅު ނަސްލުގެ މީހެއް ކަމަށްވާ ޖޯޖް ފްލޮއިޑްގެ މަރާ ގުޅިގެން މުޒާހަރާ ކުރަމުން ދިޔަ ދުވަސްވަރެވެ.
ވެނިޓީ ފެއާ މަޖައްލާއަށް ދިން އިންޓަވިއގައި ބީޓީއެސް އިން ބުނީ އެ ބޭންޑުގެ މެމްބަރުން ގައުމުން ބޭރުގައި އުޅޭއިރު ބައެއް ފަހަރު ތަފާތު ކުރުމާ ކުރިމަތިލާން ޖެހޭ ކަމަށެވެ.
އެހެންކަމުން ވަކި ނަސްލަކަށް ވީތީ ތަފާތު ކުރުމަކީ އެއް ގޮތަކަށް ވެސް ތަހައްމަލްކޮށްގެން ވާނެ ކަމެއް ނޫން ކަމަށް އެ ބޭންޑުގެ މެމްބަރުން ވަނީ ބުނެފަ އެވެ.
"ބްލެކް ލައިވްސް މެޓާ" އަށް ފައިސާގެ އެހީތެރިކަން ދިނުމަށް ފަހު ބީޓީއެސް އިން ވަނީ ކަޅު ނަސްލުގެ މީހުންނާއެކު އެމީހުންވާކަން ދެއްކުމަށް ޓްވިޓާގައި މެސެޖެއް ޕޯސްޓުކޮށްފަ އެވެ.
އެ އެހީ ދިނުމާއެކު "އާމީ" ގެ ނަމުން މަޝްހޫރުވެފައިވާ ބީޓީއެސްގެ ފޭނުން ވަނީ އެންމެ 25 ގަޑިއިރުގެ ތެރޭގައި އެއް މިލިއަން ޑޮލަރު ހޯދާ، އެ ފައިސާ ވެސް އެ މޫވްމަންޓަށް ހަދިޔާކޮށްފަ އެވެ.
