އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ސަންޖޭ ސުދީރު، އެ ފެރީ ދިވެހި ސަރުކާރާ ހަވާލުކޮށްފައި ވަނީ މިދިޔަ ޖުލައި މަހުގެ އަށް ވަނަ ދުވަހު އެވެ.
ތިރީސް ކުދިންގެ ޖާގައިގެ އެ ލޯންޗު ހަދާފައި ވަނީ އިންޑިއާ އިން ރާއްޖެއަށް ދިން 2.5 މިލިއަން ރުފިޔާގެ ގްރޭންޓް އެހީގެ ދަށުންނެވެ.
އާބާދީ މަދުވުމާއި ގުޅިގެން 2008 ވަނަ އަހަރުން ފެށިގެން ފެހެންދޫ ސްކޫލުގައި ކިޔަވައިދިނުން ހުއްޓާލާފައިވާއިރު އެރަށުގެ ދަރިވަރުން ކިޔެވުމަށް ދަނީ އެރަށާއި އެއް ފަޅެއްގައި އޮންނަ، ގޮއިދޫ އަށެވެ. އެގޮތުން އެރަށުގެ 26 އަކަށް ދަރިވަރުން ގޮއިދޫއަށް ކިޔަވަންދެ އެވެ.
އިންޑިއާ ހައި ކޮމިޝަނުން މިއަދު ކުރި ޓްވީޓުގައި ބުނީ ބ. ފެހެނދޫއާއި ގޮއެދޫއާ ދެމެދު ދަރިވަރުންނަށް ގާއިމްކުރެވުނު ފެރީގެ ހިދުމަތުގެ ސަބަބުން ފެހެނދޫ ދަރިވަރުން ޑިންގީއެއްގައި ސްކޫލައް ކުރަމުން އައި ދަތުރު ނިމިފައިވާ ކަމަށެެވެ. އަދި އެ ފެރީގެ ހިދުމަތުގެ ސަބަބުން ދަތުރުގައި ދަރިވަރުން ހޭދަކުރާ ވަގުތު ކުރުވެ، ދަތުރުގެ ސަލާމަތްތެރިކަން އިތުރުވެފައިވާ ކަމަށެވެ.
އެ ރަށު ކައުންސިލުގެ ރައީސް މޫސާ ނަސީމް މީގެ ކުރިން ސީއެންއެމްއަށް ވިދާޅުވި ގޮތުގައި ކޮންމެ ދުވަހެއްގެ ހެނދުނު ވެސް ޑިންގީގައި ތިން ބުރު އެދެމެދުގައި ދަރިވަރުން ގޮވައިގެން އަޅަންޖެހެ އެވެ.
އެ ފެރީ ނުލިބޭއިރު ޑިންގީއެއްގައި އެ ދަރިވަރުން ސްކޫލަށްދާން ޖެހޭއިރު ދޭތެރެއަކުން އެކުދިން ސްކޫލަށްދާ ގޮތުގެ ހިތްދަތި ވީޑިއޯތައް ވެސް ސޯޝަލް މީޑިއާގައި ދައުރު އެވެ.
