ކުށަށް ބަލާއިރު ހުކުމަކީ އިންސާފަށް ލިބުނު ކުރިއެރުމެއް ނޫންކަމަށާއި މިއީ ލިބުނު އިބުރަތެއް ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.
Advertisement
އެމްއެމްޕީއާރްސީގެ ހިޔާނާތުގެ މައްސަލައިގައި ކުރީގެ ނައިބު ރައީސް އަހުމަދު އަދީބުގެ މައްޗަށް 20 އަހަރުގެ ޖަލު ހުކުމެއް އިއްވުމާއި ގުޅިގެން ކުރީގެ ރައީސް އަބްދުﷲ ޔާމީންގެ ގާނޫނީ ވަކީލުންގެ ޓީމުގައިވެސް ހިމެނިވަޑައިގަންނަވާ ޖަމީލް ކުރެެއްވި ޓްވީޓެއްގައި ވިދާޅުވީ ކުށަށް ބަލާއިރު ހުކުމަކީ އިންސާފަށް ލިބުނު ކުރިއެރުމެއް ނޫންކަމަށާއި އުފާ ނުވާކަމަށެވެ.
ޖަމީލް ވިދާޅުވީ މިއީ އިބްރަތެއް ކަމަށެވެ. ގޯހަކުން ލިބޭނެ މޮޅެއް، އިއްޒަތެއް އަދި ހައްގަކަށް އަރައިގަނެގެން ލިބޭނެ ކުރިއެރުމެއް ނެތްކަމާއި މީހުން ފްރޭމްކޮށްގެން ކުރި ނުލިބޭނެކަން މި ލިބުނު އިބުރަތުން އެނގިގެންދާކަމަށް ޖަމީލް ވިދާޅުވިއެވެ.
އޭގެ އިތުރުން ޖަމީލް ވިދާޅުވީ ތަގްދީރުގެ ނިޔާ މާ މޮޅުވާނެކަން ގަބޫލްކުރަންވާ ކަމަށެވެ.
ޖަމީލް ވަނީ ހުކުމް އިއްވުމުގެ ކުރިން އަދީބު ގޭބަންދަށް ދޫކޮށްލުމުންވެސް ކަންބޮޑުވުންތަކެއް ފާޅުކޮށް އަށްސަތޭކަ އަހަރުގެ ހުކުމެއް އަންނަން އޮތް މީހާގެ ނުރައްކަލެއް މުޖުތަމައުއަށް ނެތީތޯ ސުވާލުކުރައްވާފައެވެ.
އެމްއެމްޕީއާރްސީގެ ހިޔާނާތުގެ މައްސަލައިގައި އަދީބުގެ މައްޗަށް ހަތް ދައުވާ އެއް އުފުލާފައިވާއިރު އެހުރިހާ ދައުވާއަކަށްވެސް އޭނަވަނީ އިއުތިރާފްވެފައެވެ. އަދި ހުކުމުގެ ކުރިން އިއްވި އިބްތިދާއީ އަޑުއެހުމުގައި އޭނަވަނީ އެކަމުގައި ކަނޑައަޅާދެވެން އޮތް އެންމެ ކުޑަ އަދަބެއް ކަނޑައަޅާދިނުމަށްވެސް އެދިފައެވެ.
ދެ ގަޑިއިރަށް ދިގު ލައިގެން ދިޔަ ހުކުމް ކުރުމުގެ ޝަރީއަތުގައި އަދީބުގެ މައްޗަށް ޖުމުލަ 20 އަހަރުގެ ޖަލު ހުކުމެއް އިއްވި އިރު 2 މިލިއަން ރުފިޔާއިން ޖުރިމަނާ ކޮށް އެފައިސާ އެއް މަސްދުވަހުގެ ތެރޭގައި ދެއްކުމަށްވެސް ހުކުމް ކޮށްފައިވެ އެވެ.
