ހަލުވިކަމާއެކު ކޮވިޑް-19 ގެ ބަލިމަޑުކަން ފެތުރެމުންދާ ޗެކް ރިޕަބްލިކްގެ އޮފިޝަލުން އިއްޔެ ބުނީ އަންނަ ބުދަ ދުވަހުން ފެށިގެން އެ ގައުމުގައި ހަރުކަށި ފިޔަވަޅު އެޅުމަށް ނިންމާފައިވާ ކަމަށާއި، އިތުރު ލޮކްޑައުނެއް ގެންނަން ބޭނުން ނުވާ ކަމަށެވެ.
ޗެކް ރިޕަބްލިކްގެ ބޮޑުވަޒީރު އަންދްރޭ ބާބީ ވިދާޅުވީ އަޅާނެ ފިޔަވަޅުތަކާ މެދު ވިސްނަމުންދާ ކަމަށާއި، ބުދަ ދުވަހުން ފެށިގެން އެ ފިޔަވަޅުތައް ތަންފީޒު ކުރާނެ ކަމަށެވެ. ނަމަވެސް އަޅާނެ ފިޔަވަޅުތަކުގެ ތަފްސީލެއް އޭނާ ނުދެއްވަ އެވެ.
ޗެކް ރިޕަބްލިކްގެ ފިނޭންސް މިނިސްޓަރު އަލީނާ ޝިލެރޯވާ އާދީއްތަ ދުވަހު ކުރިން ވިދާޅުވެފައި ވަނީ އިތުރު ލޮކްޑައުނަކަށް ދާން ބޭނުން ނުވާ ކަމަށާއި، އާންމު ތަންތަނުގައި އެއްފަހަރާ ގިނަ ބަޔަކު އެއްވެ އުޅުން މަނާ ކުރާނެ ކަމަށެވެ.
މިހާތަނަށް އޮކްޓޯބަރު މަހު އެކަނިވެސް ޗެކް ރިޕަބްލިކުން ވަނީ ކޮވިޑް-19 ގެ 43،000 އަށް ވުރެ ގިނަ ކޭސްތައް ރިޕޯޓްކޮށްފަ އެވެ. މިދިޔަ ހަފްތާގައި 76 އިންސައްތަ އަށް ވުރެ ގިނަ މީހުން ވަނީ އެނދުމަތިކޮށްފަ އެވެ. އެހެންވެ ހޮސްޕިޓަލްތައް ފުރިގެން ދިޔުމުގެ ކަންބޮޑުވުންތައް ވަނީ އިތުރުވެފަ އެވެ.
